नेकपा एमालेया झीक्वःगु राष्ट्रिय महाधिवशनय् अध्यक्ष नाप छु पदाधिकारी व केन्द्रीय सदस्यपिनिगु लागि मतदान सुरु जुगु दु।

थौं मंगलबाः सुथय् ४ बजे निसे सुरु जुगु मतदानय् सुरु हे अध्यक्षया उम्मेदवारपि केपी शर्मा ओली व भीम रावलपिन्स मतदान याउगु खः। निर्वाचन आयोगया कथं आः अध्यक्ष, उपाध्यक्ष व सचिव नाप न्ह्यगू क्लस्टरया केन्द्रीय सदस्यपिनिगु लागि चुनाव जुयाच्वंगु दु।

अध्यक्षय् केपी शर्मा ओली व भीम रावल नाप खुम्ह उपाध्यक्षया जागि अष्टलक्ष्मी शाक्य, घनश्याम भुसाल, युवराज ज्ञवाली, रामबहादुर थापा, विष्णु पौडेल, सुरेन्द्र पाण्डे व सुवास नेम्वाङपिनिगु उम्मेदवार दुगु खः। अथेहे न्ह्यम्ह सचिवया लागि गोकर्ण विष्ट, छविलाल विश्वकर्मा, टंक कार्की, टोपबहादुर रायमाझी, पद्मा अर्याल, भीम आचार्य, योगेश भट्टराई, रघुवीर महासेठ व लेखराज भट्टपि चुनावी मैदानय् दु। केन्द्रीय सदस्य खुलापाखे ८४ सदस्यया लागि चुनाव जुइत्यंगु दु।

प्रदेश १ य् खुला खुम्ह व मिसापि स्वम्ह सदस्यया लागि चुनाव जुइत्यंगु दु। सुदूर पश्चिम प्रदेशय् मिसा स्वम्ह सदस्यया लागि चुनाव जुइ। दलित खुला च्याम्ह, थारु खुला न्याम्ह व लिउने लाउगु क्षेत्र खुला स्वम्ह सदस्यया लागि न चुनाव जुइत्यंगु दु धका निर्वाचन आयोगं धाउगु दु।

Categorized in राष्ट्रिय