नाइजेरिया व साउदी अरबय् कोभिड–१९ या न्हुगु भेरियन्ट ‘ओमिक्रोन’ खनेदुगु दु।

थ्व नाप आःतक २२ देशय् ओमिक्रोन भेरियन्ट फैलै जुइ धुकुगु दु। बुधबाः नाइजेरियाय् रोग नियन्त्रण केन्द्रं निम्हेसित ओमिक्रोन संक्रमण पुष्टि जुगु जानकारी बिउगु दु।

संक्रमित निम्ह वंगु दक्षिण अफ्रिकापाखे वःपि यात्रुपि खः धका केन्द्रं धाउगु दु। अथेहे साउदी अरबय् न छम्हेसित कोभिड–१९ या न्हुगु भेरियन्ट ‘ओमिक्रोन’ खनेदुगु दु। दक्षिण कोरियाय् न ओमिक्रोनया संक्रमित पिहावंगु दु। अनयागु रोग नियन्त्रण तथा रोकथाम एजेन्सीया कथं नाइजेरियापाखे दक्षिण कोरिया वःम्ह निम्हतिपूयाके ओमिक्रोन खनेदुगु खः।

अथेहे थीथी सञ्चारमाध्यमया कथं न्हुगु भेरियन्ट फैलै जुगु देय् मध्ये युरोपय् १२ गु थासय् फैलै जुगु दु। युरोपय् बेलायतनाप अष्ट्रिया, बेल्जियम, चेक रिपब्लिक, डेनमार्क, फ्रान्स, जर्मनी, इटली, पोर्चुगल, स्पेन व स्विडेनय् ओमिक्रोन खनेदय धुकुगु दु धका सीएनएनं धाउगु दु। बेलायतय् जक ओमिक्रोन संक्रमितपि २२ म्ह थ्यके धुकुगु दु।

Categorized in अन्तर्राष्ट्रिय