थुगुसीया लिग न्हापाया स्वयां यक्व हे पाइगु फुकसिनं महसुस यानाच्वंग दु। लिगय् सहभागी १४ क्लब अझ व्यवसायिक फुटबलपाखे उन्मुख जूगु दु। छगू क्लबं औसत एक करोड कासामितय्गु अनुबन्धनय् खर्च याःगु दु । ग्वसाः खल अखिल नेपाल फुटबल संघ (एन्फा) व क्लबतय्त नं प्रायोजकतय्गु बांलाःगु हे तिबः दु। एन्फां प्राइज मनि अर्थात सिरपाःया राशी नं थकाःगु दु । थुगुसी लिग च्याम्पियन ७५ लाख, उपविजेता पुचः ५० लाख व लियांल्यू लाइगु पुचः २५ लाखया हकदार जुइ । अथेहे, क्लबयात त्याःगुपतिकं ५० हजार सिरपाः बी । कासा ज्वलिंज्वः जूसां तबि निगुलिं पुचलं २५–२५ हजार इना काय्दइ । अथेहे, एन्फां तयारीया नितिं फुक्क क्लबयात बीगु २० लाखया ग्वाहालि नं थनथाय् ल्वःमंकेमज्यू ।

 

थुगुसी व्यक्तिगत सिरपालय् नं ह्यूपाः वःगु दु । न्हापा न्हापा इन्डिभिज्युयल विधाय् न्याम्ह सर्वश्रेष्ठ कासामि व प्रशिक्षकयात सिरपाः बीगु चलन दुगु खः । थ्व चलनय् नं ह्यूपाः वःगु दु । थुुगुसी अन्तर्राष्ट्रिय चलनकथं गोल्डेन बुट, गोल्डेन ग्लभ्स, एमभीपी व राइजिङ प्लेयरयात सिरपाः बीगु निर्णय जूगु दु । दकले अप्वः गोल याइम्ह कासामियात गोल्डेन बुट, उत्कृष्ट गोलकिपरयात गोल्डेन ग्लभ्स, लिगय् दकसिबे बांलाःगु कासा क्यनीम्ह कासामिया मस्ट भ्यालुएबल प्लेयर व न्हूम्ह युवा फुटबलरयात राइजिङ प्लेयरया अवार्ड बीगु क्वःछ्यूगु दु ।

 

थुगुसी लिग विक इन्ड (सप्ताहन्त) य् जक जुयाच्वंगु दु । फ्लड लाइट्सय् कासा जुयाच्वंगु दु । उकिं यानाः नं न्हापांगु निगू चरणय् दर्शकतय्गु उल्लेख्य उपस्थिति दत । विदा व सनिलय् कासा न्ह्याइगु जूगुलिं फुटबलयात माया याइपिं समर्थकत थःगु ज्या

क्वचाय्काः रङ्गशला वय्गु लकस तयार जूगु दु । विक इन्डया अवधारणाअनुरुप छगू क्लबं वालय् छगू कासा जक म्हिती । न्हापा न्हापा लिगय् अप्वः क्लबया गुनासो निन्हु, स्वन्हु लिपा हे म्हितेमालीग जूगुलिं कासामितय्त आराम मन्त धइगु हे खः । लगातार म्हितेबलय् कासामित यक्व घाःपाः नं जुइगु याः । उकिं थुगुसी एन्फां विक इन्ड अले फ्लड लाइट्सया कासा न्ह्याकाः छगू सकारात्मक ह्यूपा हःगु दु । 

 

थुगुसी न्हापांगु खुसी प्यंगू मैदानयात छ्यलेगु निर्णय जूगु दु । दशरथ रङ्गशाला, सातदोबाटोया एन्फा कम्प्लेक्स मैदान, यलया हे च्यासल फुटबल मैदान व पोखरा रङ्गशाला । अथेसां न्हापांगु निगू चरण क्वचाय् धुंकाः दशरथ रङ्गशालाबाहेक मेगु मैदानय् लिग मजूनि ।

 

अथेहे कोभिडया हुनिं थुगुसी न्याम्ह सब्स्टीच्यूसनया नियम लागू याःगु दु । न्हापा छगू कासाय् स्वम्ह जक कासामि हिलेदइगु खःसां थ्व इलय् अन्तर्राष्ट्रिय फुटबल्य् छुं ईया नितिं न्याम्ह कासामि हिलेदइगु नियम छ्यःगु खः । एन्फां नं वहे नियमयात अनुसरण याःगु जुल । थ्व नियमं बेञ्च बल्लाःगु क्लबयात पक्कां यक्व लवः दइ ।

 

लिगय् सहभागी थीथी क्लबया थीथी आज्जु दु । मछिन्द्र क्लबया तातुना लिग उपाधि रक्षा याय्गु खःसा त्रिभुवन आर्मी क्लब, मनाङ मस्र्याङ्दी क्लब, थ्रिस्टार क्लबया च्याम्पियन हे जुइगु आज्जु दु । नेपाल पुलिस क्लब, संकटा क्लब थज्याःपिनिगु मिखा टप फाइभय् दु । बाकी क्लबमध्ये सुयां टार्गेट मिडटेबल व छुं क्लबया तातुना रेलिगेशनय् मलाय्गु हे खः धाःसां पाइमखु ।

 

अथेहे थ्व लिगया आकर्षण विदेशी कासामित नं खः । च्याम्पियन जुइत, मिडटेबलय् थःत लाकेत, रेलिगेशनय् मलाय्त क्लबतयसं यक्व तयारी याइ । उकीमध्ये छगू विदेशी खेलाडी अनुबन्धन नं खः । अथेला विदेशी खेलाडी नेपाली लिगया छगु हिस्सा हे

जुइधुंकूगु दु । न्हापान्हापा व्यवसायिक स्वयां मेगु हे प्रयोजनं नेपाल वइपिं युरोपेली, अमेरिकी कासामितय्सं नेपालय् लिग म्हितूगु इतिहास दु । थौँकन्हय् धाःसा व्यवसायिक अनुबन्धनं हे विदेशी फुटबलरत नेपाल वइ । थुकी नं अफ्रिकी मूलया अश्वेत कासामितय्गु सेवा काय्त नेपाली क्लबत लालायित जूगु खनेदु ।

 

फुटबलया प्राविधिक खेलय् नेपाली स्वयां अफ्रिकी कासामित बांलाइ धइगु धारणा नं दु । स्वंगू विभागिय टिम नेपाल पुलिस क्लब, त्रिभुवन आर्मी क्लब र एपीएफं आन्तरिक हुनिं विदेशी कासामित नापं करार याय्मज्यू । मेगु फुक्क निजी क्लबं विदेशी खेलाडीनाप सम्झौता याःगु दु । थुगुसी न्युरोड टिमं (एनआरटी) क्यामरुनया स्वम्ह फुटबलर मेसौके पिएरी, स्टेफन समिर व एन्द्रि थियरी, हिमालयन शेर्पां क्यामरुनया सेइउइ उलरिच, जापानया रियो नाकामुरा व केन्याया मुटम्बा पिस्टोना, मनाङ मस्र्याङ्दीं नाइजेरियाया ओलाडिपो ओलावाले, पोर्चुगलया विल जर्ज, क्यारुनया क्विटी फ्राङलिन, भारतया दयानन्द सिंह, मछिन्द्र क्लबं अजरवैजानया नुर्लान जाहिद, नाइजेरियाया ओमालाजा करिम, क्यामरुनया एन्द्रेस निया, च्यासल क्लबं इटालीया विकास मिराग्लिया, क्यामरुनया किचा यानिक व मोउसा आबागानायात आवद्ध याःगु दु ।

 

अथेहे थ्रिस्टार क्लबया जर्सीइ क्यामरुनया बिडियास रिम रफायल, क्यामरुनया प्रिसो, सातदोबाटों नाइजेरियाया पिटर सेगुन, नाइजेरियाया अजयी मार्टिन्स, दक्षिण अफ्रिकाया सिफामान्ड्ला, ब्रिगेड ब्वाइजया प्रतिनिधित्व यानाः क्यामरुनया वम्बा ड्याडी जुनियर, बेर्टरान्ड ओटोउ, रुडी जोनाथन, जावलाखेल युथ क्लबया जर्सी आइभरि कोस्टया कोरा फ्लोरेन्ट, क्यामरुनया जिमी लोइ, ओनगुइन जुनियर फ्रेन्ड््स क्लबं ट्रिनिडाडया गार्सिया जुडी, पाउल एन्थोनी व संकटा क्लबय् आवद्ध जुयाः क्यामरुनया जोर्डन जुनियर म्हिताच्वंगु दु । लिग न्ह्याय्वं क्लबतय्सं अझ विदेशी कासामि थःथःगु क्लबय् आवद्ध याय्त बः बियाच्वंगु दु।