येँ महानगरपालिका वडा नम्बर १०य् मदन भण्डारी कलेज भवनया शिलान्यास जूगु दु ।

महानगर प्रमुख विद्यासुन्दर शाक्यं कामपा वडा १० देवीनगरस्थित कलेज परिसरय् न्हूगु भवन दयेकेत शिलान्यास यानादीगु खः ।शिलान्यास धुंकाः नवासें महानगर प्रमुख शाक्यं शैक्षिक गुणस्तर थकायेत महानगरं लगानी नं थकयागु धयादिल ।

सार्वजनिक निर्माण विभागया प्रमुख रामबहादुर थापायाकथं न्ह्यानाच्वंगु आर्थिक दँय् ज्याझ्वः क्वचाइगु कथं कलेज भवन दयेकेत महानगरं ५ करोड तका आर्थिक ग्वहालि याइ ।थुकिया न्हापांगु किस्ता बी धुंकूगु दुसा ल्यं दनिगु धेबा ज्याया प्रगतिया लिधंसाय् बियायंकीगु धाःगु दु ।

कलेजया कथं र भवन निर्माणया लागत १० करोड तका खः । थ्व हे आर्थिक दँया असार मसान्त दुने निर्माण क्वचायेकेगु आज्जु कयातःगु दु ।

Categorized in राष्ट्रिय