किपू नगरपालिका वडा नं. २ पीगनय् पुनर्निर्माण याःगु पीगं फल्चा व सामुदायिक भवनया मूपाहाँ किपू नगरपालिकाया प्रमुख रमेश महर्जनं उलेज्या यानादीगु दु। छगू ज्याझ्वलय् मूपाहाँ नगर प्रमुख महर्जनं उगु फल्चा व भवनया उलेज्या यानादीगु खः ।

मूर्त व अमूर्त सम्पदाया संरक्षण व सम्बद्र्धनय् मद्दिक्क ज्या यानाच्वंगु किपू नगरपालिकां पीगनय् च्वंगु थुगु फल्चा व भवन दयेकेत बजेट ब्यूगु खःसा वडा नं. २ पाखें नं बजेट तयाब्यूगु खः। थुगु पुनर्निर्माण जूगु फल्चा किपूया ताःहाकःगु फल्चा मध्ये छगू खः । थुगु फल्चा न्हय्कवःया खः ।फल्चा व सामुदायिक भवनया उलेज्या यानादिसें नगर प्रमुख महर्जनं झीगु म्हसिका जुयाच्वंगु मूर्त सम्पदात वंगु तःभुखाचं ध्वस्त धयाथें जूगुलिं किपू नगरपालिकां माःगु ग्वहालि याना पुनर्निर्माण यानाच्वनागु खँ न्ह्यथनादिल ।

आःतक फल्चा जक थ्यंमथ्यं ३६ गू पुनर्निर्माण यायेधुनागु दुसा आः छुं दिं लिपा हाकनं स्वंगू प्यंगू फल्चा दयेके क्वचाइगु जानकारी बियादिल । नगर प्रमुख महर्जनं थुगु मूर्त सम्पदायात आय आर्जन यायेगु ज्याय् छ्यलेमाःगु खँय् बः बियादिल । अथहे उप–प्रमुख सरस्वती खड्कां मूर्त व अमूर्त सम्पदाया संरक्षणंयाना न्हूपुस्तायात सम्पदा लःल्हाये फइगु धयादिसें नगरपालिकां धेबा खर्चयाना दयेकूगु मूर्त सम्पदात क्यना पर्यटकत वयेकेगु लकस दयेकेमाःगु धयादिल । उप–प्रमुख खड्कां नगरपालिकां विकास यायेगु झ्वलय् भौतिक कथंजक मखुसे थीथी मूर्त व अमूर्त सम्पदातय्गु संरक्षण यायेगु ख्यलय् उल्लेख्य ज्या यानाच्वनागु धयादिल ।

ज्याझ्वलय् किपू नगरपालिका वडा नं. १ या अध्यक्ष हर्ष महर्जन, वडा नं. ६ या अध्यक्ष न्हुच्छेबहादुर महर्जनं नं थःथःगु नुगःखँ तयादीगु खःसा वडा नं. २ या थीथी विकास निर्माणया ज्याय् योगदान यानादीपिं थीथी उपभोक्ता समितिया दुजःपिंत हना पौ लःल्हानादिसें हनादीगु खःसा थीथी बाजंखलःपिंत पचिमा, बाँसुरी, तबला लःल्हानादीगु खः । अथेहे ईन्द्रायणी क्लबयात टेबल टेनिस बोर्ड व माइक सहित स्पिकर लःल्हानादीगु खः ।

ब्याडमिण्टनया राकेट व शटल कक नं लःल्हानादीगु ज्याझ्वलय् वंगु यंलाया इलय् पीगं सीकेगु धेंधेंबल्ला कासाय् निर्णायक जुयादीपिं प्रयागमान प्रधान, डा. वज्रमुनि वज्राचार्य व विरेन्द्र विनु शाक्य व लक्ष्मण महर्जनयात नं सुभाय् पौ बियादिसें हनादीगु खः । कपू नगरपालिका वडा नं. २ या अध्यक्ष रमेशमान डंगोलया सभापतित्वय् जूगु फल्चा उलेज्या व हना ज्याझ्वलय् सभापति डंगोलं सुभाय देछानादीगु खःसा सन्तोष महर्जन व सविना नापितं ज्याझ्वः न्ह्याकादीगु खः ।

Categorized in राष्ट्रिय