थौंकन्हय्या हे खँ ल्हाय्गु खःसा छुं दिं न्ह्यः तिनि यल महानगरपालिका १६ वडाया पट्को त्वालय् च्वंगु लक्ष्मी–नारायण (वासुदेव कमलाजा) या मूर्ति न्हापा तंगु खःसा लिपा अमेरिकाय् लुइधुंकाः लित हय्गु ज्या नं जुल व द्यःया उगु मूर्तियात पट्कोया देगलय् प्रतिस्थापन याय्गु ज्या नं झःझः धाय्क क्वचाय्धुंकल।

 

अथे हे, येँया ओमबहालं ४० दँ न्ह्यः खुयायंकूगु भगवान बुद्धया मूर्ति अमेरिकाया छगू गैरसकारी कला–संस्कृतिसम्बन्धी संग्रहालय लुयावःगु खँ आः चर्चाय् दु। येँ ओमबहाःया न्हूछेँबहालं सन् १९८० या दशकय् बुद्ध अक्षोभ्यया उगु मूर्ति खुयायंकूगु खः। ६सः दँ पुलांगु ल्वहंया उगु मूर्ति आः वयाः अमेरिकाया न्यूयोर्कय् तिब्बत हाउस संग्रहालयय् लुयावःगु खः।

 

थ्वयां न्ह्यः नं थीथी मूर्ति वा झीगु ऐतिहासिक, धार्मिक सम्पदात पिने देशय् लुयावःगु दुसा अज्याःगु सम्पत्ति आः नेपालय् हे लितहय्गु पहल नं बांलाःगु कथं नालेमाः। तर थथे तंगु सम्पदात धमाधम लुयावयाच्वंगु हे इलय् हल्चोकय् धाःसा आकाश भैरवया मुर्ति खुयायंकूगु दु। वंगु मंगलबाः चान्हय् १२ बजेनिसे साढे १२ बजे दुने उगु मुर्ति खुयायंकूगु हल्चोक आकाश भैरव गुथिया अध्यक्ष सागर पुतुवारं जानकारी बियादीगु दु।

 

वय्कःया कथं प्यंगः न्यागः मोटरसाइकलय् वःपिं मनूत द्यःया ल्यूनं पःखाः गयावयाः द्यः खुयायंकूगु खः। अन देगलय् पूजारी छम्ह द्यनेगु यानाच्वंगु दुगु खःसां पुजारीयात ज्यानया हे धम्की बियाः खुँतय्सं मुर्ति खुयायंकूगु खः । उगु मुर्ति खुयायकूंपिन्त मालेगु ज्या जुयाच्वंगु प्रहरीया धापू दु।