प्रधानमन्त्री शेरबहादुर देउवां सर्वदलीय बैठक सःतूगु दु। कन्ह्य न्हिनय् ४ बजेया लागि बैठक सःतूगुु दु सा छु विषयया लागि सःतूगु धका धाउगु मदुनि।

प्रधानमन्त्री देउवाया सचिवालय कथं बैठकय् प्रतिनिधिसभाय् प्रतिनिधित्व याइगु राजनीतिक दलया शीर्ष नेता व पूर्वप्रधानमन्त्रीपिन्त सःतूगु खः।

स्रोतं बिउगु जानकारी कथं प्रधानमन्त्री देउवां प्रतिनिधिसभा बैठक सञ्चालन व मिलेनियम च्यालेन्ज कर्पोरेसन (एमसीसी) सम्बन्धी सम्झौता अनुमोदन विषय संसदय् दुगु दलपि नाप छलफल यायेत्यंगु खः।

सरकारं संसद चालु अधिवेशनपाखे एमसीसी सम्झौता पारित यायेगु तयारी दु। तर नेकपा एमाले न थःपिनिगु सांसदपिन्त यानागु कारबाहीयात सभामुखं मान्यता मबिउगु धासे संसद अवरोध याना वयाच्वंगु खः।

अथेहे सत्तारुढ गठबन्धनय् दुपि नेकपा माओवादी केन्द्र, एकीकृत समाजवादी केन्द्र लगायतया दल एमसीसी सम्झौता गथे खः अथे पारित याये मज्यू धइगु पक्षय् दु।

Categorized in राष्ट्रिय