नेपालभाषाया नितिं कानुन हयेत वागमती प्रदेश सरकार तयार
लहनान्युज | थिंलागा पंचमी ११४२, पुष ९ शुक्रवाः
नेवाःतय्गु राष्ट्रिय संगठन नापं मंकाः संगठन नेवाः देय् दबू व तामाङ घेदुङपाखें भाषा आयोगया सिफारिस कथं वागमती प्रदेशय् नेपालभाषा व तामाङ भाषायात कामकाजि भाषाया रुपय् छ्यलेत मागयासें प्रदेश मुख्यमन्त्रीयात नापं सभामुखयात ज्ञापन पौ लःल्हाःगु दु ।
विहिवाः वागमती प्रदेशया राजधानी हेटौंडाय् हे वना प्रदेशया मुख्य मन्त्री राजेन्द्र कुमार पाण्डेया ज्याकुथिइ हे वना ज्ञापन पौ लःल्हायेगु ज्या जूगु खः । नेवाः देय् दबूया नायो नरेश ताम्रकारं लःल्हानादीगु ज्ञापन पतिइ नेपाःया संविधान कथं भाषा आयोगया सिफारिस कथं वागमती प्रदेशय् नेपालभाषा व तामाङ भाषायात कामकाजि भाषाया रुपय् कार्यान्वयनया नितिं सम्वन्धित प्रदेशपाखें कानुन दयेकेमाःगु जुया उकिया नितिं माःगु कथंया ज्या न्ह्याकेत माग यानातःगु दु । उगु इलय् मुख्यमन्त्री पाण्डें नेवाः व तामाङ समुदायया मागयात सरकारात्मक रुपं कयागु दु धयादिसें थःम्हं माःगु कथंया पलह यायेगु बचं बियादीगु खः।
डेलिगेशनया झ्वलय् कक्षा ९ निसें १२ तकया मातृभाषायात ऐक्षिक विषय कथं विज्ञान व गणितथें जाःगु विषययात ल्वाकाः तयातःगुलिं भाषाया सवालय् भाषाया हे विषय तया लाकेमाःगु खँय् ध्यानकर्षण यायेगु ज्या नं जूगु खः । मुख्य मन्त्री पाण्डें शिक्षाया सवालय् ९ कक्षानिसें १२ कक्षातकया नितिं प्रदेशं ऐन दयेकेमाःगु जुया उकिया नितिं थःम्हं ज्या यायेगु बचं बियादिसें मुख्य सचिवयात आदेश तकं बियादीगु खः।
विहिवाः हे नेवाः व तामाङतपाखें वागमती प्रदेशया सभामुख सानुकुमार श्रेष्ठयात भाषा आयोगया सिफारिसयात कार्यान्वयनया नितिं ऐन हयेमाःगु विषययात कया ध्यानाकर्षणयासें ज्ञापन पौ लःल्हायेगु ज्या जूगु खः । उकियात सभामुखं सकारात्मक रुपं कयादीगु दुसा अथे हे उपसभामुख राधीका तामाङ नं नेवाः व तामाङतय्गु माग कथं थःम्हं भूमिका म्हितेगु जुइ धकाः धयादिल । अथे हे वागमती प्रदेशया अर्थमन्त्री सालिकराम जमरकटेलं वर्तमान सरकारया गठबन्धनपाखें मंकाः कथंया नीति व ज्याझ्वलय् तकं भाषा आयोगया सिफारिस कथं कार्यान्वयन यायेगु दुथ्याका तयागु दु धकाः धयादिल ।
हेटौंडाय् वंगु उगु डेलिगेशनय् नेवाः देय् दबूपाखें नीस्वंगु वागमती प्रदेशय् नेपालभाषा कार्यान्वयन समितियक कजि नापं नेवाः देय् दबूया वागमनती प्रदेश नायो उपेश स्थापित, देय् दबू प्रदेश उपाध्यक्ष (हेटौंडा) विष्णुलाल महर्जन,देय् दबूया वागमती प्रदेशया छ्याञ्जे नापं समितिया दुजः श्रीकृष्ण महर्जन, देय् दबूया वागमती प्रदेशसमितिया दुजः राजेन्द्र रंजित, समितिया दुजःपिं रुक्साना कपाली, प्रसन्त डंगोल, विद्या चित्रकार अथे हे तामाङपाखें घेदुङया उपाध्यक्ष कुमार घिसिङ, महासचिव वावु घिसिङ लगायतयापिं सहभागी जुयादीगु खः । उगु इलय् वागमती प्रदेशया उर्जामन्त्री वसन्त मानन्धर, सांसदपिं विराजभक्त श्रेष्ठ, प्रतिमा श्रेष्ठ, शोभा शाक्य, नरोत्तम बैद्य नापं तामाङ समुदायया थीथी सांसदपिंलिसे सहलह ब्याकूगु खः । अथे हे मेमेगु समुदायया सांसदपिन्सं नं नेवाः व तामाङतय्गु थुगु मागयात कया सकारात्मक रुपं काःगु दु।
Categorized in राष्ट्रिय
