किपू नगरपालिका वडा नं.४ य् चम्पादेवीइ बौद्ध राष्ट्र थाइल्याण्डया छगू संस्थाया ग्वाहालिइ बुद्ध मूर्ति पलिस्थालिसें विहार निर्माण याइगु जूगु दु।

उगु भगवान गौतम बुद्धया १०८ फिट तजाःगु मूर्ति थापनालिसें विहार दयेकेत्यंगु खः ।थाइ संस्था थम्मचोटमँखोल फाउण्डेशनया ग्वाहालिइ ‘बुद्ध उद्यान फ्रासाई थाई नेपाल’ नांया विहारया निंतिं आवश्यक जग्गा किपू नगरपालिकां उपलब्ध याइगु जूगु दु।

किपू नगरपालिका व थम्मचोटमँखोल फाउण्डेशन निगू पक्षया दथुइ जूगु सम्झौता नगरपालिकापाखें नगर प्रमुख रमेश महर्जन व फाउण्डेसनपाखें प्रमुख कार्यकारी अधिकृत प्लोयथोनग्लोम्पेच थम्मचोटमँखोलं ल्हाःचिं तयादीगु खः ।सम्झौता पती ल्हाःचिं तयेगु ज्याझ्वलय् नगर उपप्रमुख सरस्वती खढ्का रिजाल, ४ वडा सदस्य सुरेन्द्र खनाल, नगरपालिका व फाउण्डेसनया नेपाल प्रतिनिधिया उपस्थिति दुगु खः ।

Categorized in राष्ट्रिय