स्वनिगःलय् कोरोना संक्रमण अप्वःगुलिसें स्थानीय प्रशासनं वंगु चान्हय्निसें स्मार्ट लकडाउन लागू याःगु दु ।

मंगलबाः स्वनिगःया प्रमुख जिल्ला अधिकारीतयेस मुँज्यां चान्हय्निसें हे ‘स्मार्ट लकडाउन’ लागू यायेगु निर्णय याःगु खः । जिल्ला प्रशासन ज्याकु काठमाडौं नं स्मार्ट लकडाउनया नितिं १८गू आदेश जारी याःगु दु ।

अथेहे यलः व ख्वपः प्रशासन ज्याकुथिं नं बिस्कं बिस्कं विज्ञप्ति पिकाना आदेश जारी याःगु दु । स्थानीय प्रशासनतयेसं सर्वसाधारणयात म्वाःमदयेकं छेँ नं पिहाँमवयेत व सार्वजनिक थासय् वनिबलय् अनिवार्य मास्क तयेत धाःगु दु ।

कोभिड महामारी सम्बन्धि स्वास्थ्य मापदण्ड अनिवार्य पालना यायेत, भौतिक दुरी कायम यायेत व साबुं लखं इलय्बिलय् ल्हा सिलेत नं प्रशासनं इनाप याःगु दु ।

अथेहे माघ ७ गते निसें सिनेमाघर व पार्टी प्यालेस लिसेंया सार्वजनिक थासय् वनिबलय् अनिवार्य खोप कार्ड क्यनेत नं इनाप याःगु दु । खोपकार्डया किपाः कया मोबाइलय् तःसा नं जिइगु व्यवस्था याःगु दु ।

अथेहे २५ म्ह सिवें अप्वः ममुनेत नं इनाप याःगु दु । वासः लिसेंया ज्वलं व सेवा आपूर्तिइ कृतिम अभाव सिर्जना याइपिं, भाः थकायेगु याःसा कानून कथं कारवाही यायेृगु नं आदेशय् उल्लेख यानातःगु दु ।

सरकारं थ्वयान्ह्यः हे माघ १५ गते तक्कया नितिं ब्वनेकु यायेधुंकुगु दु  ।

Categorized in राष्ट्रिय