येँया मरुसतः (काष्ठमण्डप)य् तयातःगु गोरखनाथ मूर्ति विवाद अदालत थ्यंगु दु।

अधिवक्ता संजय अधिकारीं मरुसतःपाखें चिइकूगु मूर्ति पुनःस्थापना यायेत माग यासें सर्वोच्च अदालतय् रिट दायर याःगु खः।अधिकारीं दायर याःगु मुद्दाया पेशी माघ २ गते आइतवाःया नितिं क्वःछ्यूगु दु । पुनःनिर्मित मरुसतःया छ्यलिया थ्यंमथ्यं दथु भागय् दूगु गोरखनाथ व प्यंगू कुनय् दूगु गणेद्यःया मूर्ति न्हूगु तःगु दु।

तर, व ज्यां प्राचीन स्मारक संरक्षण ऐन मिचेजूगु, धार्मिक आस्थाय् घाःपाः लाकूगु, सम्पदा संरक्षणसम्बन्धी अन्तर्राष्ट्रिय कानून मिचेजूगु, संवैधानिक मौलिक हक हनन जूगु दाबी यासें अधिकारीं अदालतय् मुद्दा दायर याःगु खः । मरुसतः दुने गोरखनाथ व गणेद्यःया मूर्ति तज्याःगु धासें पुनःनिर्माण समितिं न्हूगु मूर्ति हयेधुंकाः थुकिया समर्थन व विरोध निगुलिं जूगु दु।

गुलिंसिनं पुलांगु मूर्ति तज्याःगु व उज्वःगु मूर्ति पूजा यायेमज्यूगु मान्यता दूगुलिं न्हूगु हःगुयात पायछि धाःगु दु।

गुलिं स्थानीय व संरक्षणकःमिपिन्सं धाःसा पुलांगु मूर्ति हे तयेमाःगु धारणा तःगु दु ।पुरातत्व विभागया कथं भुखाय् लिपा पूर्णरुपं क्षतिग्रस्त मरुसतः दुने मूर्तित तज्याःगु अवस्थाय् लुयावःगु खः। गुलिंसिनं मरुसतः पुनःनिर्माण लिपा उगु मूर्तियात हे लितहयेमाःगु माग यायेधुंकाः न्हूगु मूर्ति तयेमाःगु पक्षय् दूगु देगः पुनःनिर्माण समिति मछिंगु अवस्थाय् लाःगु दु।

प्राचीन स्मारक संरक्षण ऐन २०१३ कथं सरकारया स्वीकृति विना प्राचीन स्मारकया सम्पदायात थुनेगु, चिइकेगु, हिलेगु विरुप यायेगु थेंजाःगु ज्या याये दइमखु । पुरातात्विक वस्तुयात नष्ट याःसा, थुनाब्यूसा, विरुप याःसा, खुया यंकूसा वा अनधिकृत रुपं चिइकूसा वा हिलेगु ज्या याःसा वा छुं नं कथं हानी नोक्सानी याःसा उज्वःगु पुरातात्विक वस्तुया बिगो कथंया रकम असुल उपर यानाः न्याद्वः तका दांनिसें छगू लख तकातक जरिवाना वा न्यादँतक कैद वा निगुलिं सजाय जुइगु व्यवस्था दु।

Categorized in राष्ट्रिय