२०७९ जेठ ७, शनिबार

जोकोभिचयात अस्ट्रेलिया ओपन टेनिस म्हित मखनिगु जुल

लहनान्युज | थिंलागा चतुर्दशी ११४२, माघ २ आईतवाः

विश्व नं. १ टेनिस कासामि नोभाक जोकोभिचयात अस्ट्रेलियां पितनीगु जूगु दु।

अस्ट्रेलियन ओपन टेनिस म्हितेत अस्ट्रेलियाय् वम्ह जोकोभिचयात कोभिड सम्बन्धी नियम पालना मयाःगु धासें भिसा रद्द याना बिउगु खः । जोकोभिचं थुकियात कयाः निक्वः तक तःगु मुद्दायात अस्ट्रेलियाया संघीय अदालतं खारेज यानागुलि देश त्वःतेमालीगु जूगु खः।

संघीय अदालतया स्वम्ह न्यायाधीशपिन्स सर्वसम्मतिं सरकारं जोकाभिचया भिसा रद्द यायेगु धकाः याःगु निर्णय कायम हे जुइगु आदेश बिउगु खः । थुकिया लिसें जोकोभिचं आः अस्ट्रेलियन ओपन टेनिस नं म्हिते मखनीगु जूगु दु ।अदालतया निर्णय लिपा जोकोभिचं थः तसकं निराश जूगु धासें तर थःम्हं अदालतया निर्णययात सम्मान यायेगु धाःगु दु।

अस्ट्रेलिनय ओपन म्हितेगु निंतिं वःम्ह जोकोभिचयात अस्ट्रेलियन सरकारं वंगु जनवरी ६ तारिखय् भिसा रद्द यासें आप्रवासी हिरासतय् तःगु खः। थुकिया विरुद्ध जोकोभिचं तःगु छगू मुद्दाय् स्थानीय अदालतं सोमवाः सुनुवाई यासें सरकारं याःगु निर्णय गलत जूगु धासें जोकोभिचयात तुरुन्त त्वःतेत आदेश बिउगु खः।

थ्व लिपा नं अस्ट्रेलियन सरकारं हाकनं जोकोभिचया भिसा रद्द यासें आप्रवासी हिरासतय् तःगु खः । थुकिया विरुद्ध निक्वःखुसीइ तःगु मुद्दा धाःसा संघीय अदालतं खारेज यासें सरकारया निर्णय पक्षय् फैसला न्यंकूगु खः।

Categorized in कासा