किपू नगरपालिकाया वडा १० या भवन उलेज्या
लहनान्युज | पोहेलागा तृतीया ११४२, माघ ६ बिहीवाः
किपू नगरपालिकाया वडा १० या भवन किपू नगरपालिकाया मेयर रमेश महर्जन व काठमाडौं जिल्ला समन्वय समितिया प्रमुख शिवसुन्दर राजवैद्य मंकाः कथं उलेज्या याउगु दु।
किपू नगरपालिका १० वडाया वडाध्यक्ष अमन महर्जनया सभाध्यक्षताय् जुगु उगु वडा भवन उलेज्या ज्याझ्वलय् मेयर रमेश महर्जन व शिवसुन्दर राजवैद्य उप– मेयर नापं प्रवक्ता सरस्वती रिजाल खड्का विशेष पाहाँ कथं उपस्थित जुयादीगु खः।
उगु वडा भवन ०७५÷०७६ सालपाखे उपभोक्ता समितिपाखें मुक्कं इस्टिमेट ५० लखया याःगु खःसा १८,७७,०००÷– तका दां उपभोक्ता समितियात भुक्तानी यानागु खँया जानकारी बियादिगु खः।
अथेहे, ०७७÷०७८ पाखे ९६,९६,७०७÷– तका टेण्डरपाखें इस्टिमेट याःगु खःसा ५९,७०,७४४÷– तका कबूल जूगु खः धकाः वडाध्यक्ष महर्जनं जानकारी बिसें आः वडा भवन तयारी अवस्थाय् निर्माण ज्या क्वचाःगु जानकारी बियादीगु खः।
