स्वनिगलय् थौं निसे कोभिड–१९ सङ्क्रमणया कारण यातायातय् जोरबिजोर प्रणाली लागू याउगु दु।

स्थानीय प्रशासन (येँ, यल व ख्वप) या मंकाः बैठकया निर्णया कथं जोरबिजोर प्रणाली लागू याउगु खः। उगु आदेशा कथं अत्यावश्यक सेवामा प्रयोग जुइथस व तोके यानातःगु सवारीयात धासा जोरबिजोर प्रणाली लागू जुइमखु। आदेशय् वासः नाप स्वास्थ्य सामग्री ल्ह्यइगु, एम्बुलेन्स, दमकल, शवबाहन, ग्याँस, पेट्रोलियम पदार्थ ल्ह्यइगु सवारी साधनय् जोर बिजोर प्रणाली लागू जुइमखु।

अथेहे खाद्यान्न, दुग्धजन्य पदार्थ, फलफूल, तरकारी, लः, खेँ, पशुपन्छी, दाना नाप कृषि तथा पशुजन्य सामग्री ल्ह्यइगु सवारी साधन न निर्वाधरुपं सञ्चालन याये दइ। अथेतु,परिचयपत्रया आधारय् बैंक, बीमा, वित्तीय संस्था, वायुसेवा कम्पनी, डाँक नाप कुरियर सेवा, दूरसञ्चार, सेवा प्रदायक निकायया कर्मचारीपिन्न्स चले याये दइ धका आदेशय् उल्लेख यानातःगु दु ।

सूचना तथा प्रसारण विभागपाखे जारी प्रेस पास नाप पत्रकार परिचयपत्र दुपि सञ्चारकःमिपिन्स न सवारी साधन चले याये दइ। सरकारी व कूटनीतिक नियोगया सवारी साधन सञ्चालन याये दइ धक जारी आदेशय् उल्लेख यानातःगु दु।

Categorized in राष्ट्रिय