सहिद गंगालाल श्रेष्ठयात म्हसीके
रबि रंजित | पोहेलागा नवमी ११४२, माघ १२ बुधवाः
देशय् इलय्ब्यलय् यानाः तःक्वः हे राजनीतिक परिवर्तनत जूगु दु । थुकथंया परिवर्तनया झ्वलय् आः ला देशय् निरंकुश राजतन्त्रया अन्त्य जुयाः संघीय लोकतान्त्रिक गणतन्त्र तकं वय्धुंकल ।
देशय् थ्व छगू तःधंगु परिवर्तन खः । थुकथं हे थीथी परिवर्तनमध्ये २००७ या परिवर्तन नं छगू महत्वपूर्ण परिवर्तन कथं कयातःगु दु, काय्माः । देशय् राणातय्सं १०४ दँ तक्क शासन यात ।
वि.सं. १९०३ निसें २००७ सालतक्कया थ्व राणा शासनय् जनतां यक्व हे दुःख सीमाल । नेवाःतय्त ला नेवाः भाय् ल्हात, नेवाः भासं च्वल धकाः हे जेलय् कुनेगु ज्या यात । थुकथंया निरंकुश
राणा शासन क्वथलेत यक्व मनूतय्सं भूमिका म्हितूगु दु । विशेष कथं राणा शासनविरुद्ध आन्दोलनय् होमय् जुयाः थःगु प्राणया तकं बलिदान ब्यूपिं प्यम्ह शहिदतय्त ईतिहासं गबलें ल्वःमंके फइमखु । वय्कः प्यम्ह शहिदमध्ये छम्ह खः, गंगालाल श्रेष्ठ । भक्तलाल श्रेष्ठ व तुल्सीमाया श्रेष्ठया जेठाम्ह काय् गंगालाल श्रेष्ठ वि.सं. १९७५ सालय् रामेछापया भगेरी गामय् जन्म जूगु खः । थः मांअबुपाखें हे शिक्षा कयाः लिपा थः ककानापं भारतया कलकत्ताय् ब्वंवन । अन स्वदँतकया ब्वनेगु ज्या सिधय्काः येँ लिहावःगु खः ।
गंगालाल श्रेष्ठ वि.सं. १९७४ सालय् येँया दरवार हाइस्कुलपाखें न्हापांगु श्रेणीइ ‘म्याट्रीक्स’ पास यानादीगु खः । लिपा त्रिचन्द्र कलेजय् विज्ञान संकाय अध्ययन यानादीगु खः । थुगु इलय् वय्कलं कलाकारितानापं महाबीर संस्थाय् क्रियाशील जुसें निरकुंश राणा विरोधी गतिविधिइ सक्रिय जुयादीगु खः ।
व हे झ्वलय बि.सं. १९७५ साल कार्तिक २ गते शुक्रराज जोशी (शास्त्री) या सभाय् गंगालालं न्ववावाच्वंगु इलय् येँया प्याफलं वय्कःयात ज्वंगु खः । थुवलय् वय्कःयात सामान्य यातना बियाः त्वःताब्यूगु खःसा लिपा दशरथ चन्दया संगतं प्रजा परिषद्या दुजः जुसें हाकनं राणा शासनया विरोधय् सक्रिय जुयाच्वंगु इलय् ज्वनाः दशरथ चन्दनापं केन्द्रिय कारागारय् कुनाबिल ।
वि.सं. १९९७ साल माघ १५ गते दशरथ चन्दनापं गंगालालयात केन्द्रिय कारागारं शोभा भगवति विष्णुमति खुसिया बगरय् सुथय् न्हापां राणातय्गु मतियारपाखें स्वंगः गोली कय्काः स्यानाब्यूगु खः । २४ दँया गंगालालंं थःयात ज्वनाः यातना बियाः स्याइ धकाः सीकं नं राष्ट्र व जनताया नितिं थःगु प्राणया बलिदान ब्यूम्ह छम्ह नेवाःया काय्मचा खः ।
गंगालालयात मृत्युदण्ड बीगु निन्हु न्ह्यः वय्कःया काय् बूगु खः तर, वय्कलं थः काय्या ख्वाः तकं स्वय्मखं । थुबलय् गंगालालयात माफि फ्वंकेत राणातय्सं धन सम्पत्तिया प्रलोभन नं क्यंगु खःसा वय्कलं राष्ट्र व जनताया नितिं फुकं त्याग यासें मृत्युदण्डयात हे स्वीकारे यानाः माघ १५ गते नेपाली जनताया स्वतन्त्रताया नितिं थःगु प्राणया बलिदान बियाः सदां सदांया लागि ‘अमर’ जुयादिल ।
