पेट्रोल भाः आःतकाय् न्हुगु रिकर्ड
लहनान्युज | सिल्लाथ्व पारु ११४२, माघ १९ बुधवाः
सरकारं हाकन पेट्रोलियम पदार्थ भाः थकाउगु दु।
पेट्रोल भाः आःतका हे दकलय् अप्पोगु जुया न्हुगु रेकर्ड कायम जुगु दु। थौं चान्ह्यः १२ बजे निसे लागू कथं पेट्रोल व डिजल÷मचिकं लिटरय् स्वतका थिके यानागु धका नेपाल आयल निगमं धाउगु दु।
आः पेट्रोल १४२ व डिजल÷मचिकंया भाः लिटरं १२५ रुपैयाँ कायम जुगु दु। थ्व स्वया न्ह्यः २०७० साल फागुन ३० गते समायोजन जुगु कथं पेट्रोल लिटर १४० रुपैयाँ तक थ्यःगु खः। आन्तरिक हवाई इन्धन लिटरय् झीतका थकया ११६ रुपैयाँ तोके याउगु दु।
अन्तर्राष्ट्रिय हवाई इन्धन प्रतिकिलो लिटर अमेरिकी डलर १०० न थहावंगुलि प्रतिकिलोलिटरया भाः अमेरिकी डलर १ हजार ९५ कायम जुगु दु धका निगमया सहप्रवक्ता पुष्कर कार्की न जानकारी बिउगु दु।
एलपी ग्याँसया न्हुगु भाः छगः सिलिण्डर ८१.६२ रुपैयाँ न घटे जुयावसां अय्न निगमयात छगः सिलिण्डरय् ५६०.०९ रुपैयाँ घाटा दु धका आःया हे भाः यथावत् दु धका निगमं धाउगु दु।
थ्व समायोजन लिपा निगमया १५ दिं याउगु घाटा ३७ करोडं घटे जुया करीब २ अर्ब २३ करोड रुपैयाँ कायम जुगु दु धका निगमं जानकारी बिउगु दु।
