किपू नगरपालिका वडा नं. १० य् नेवाः वसः सुयेगु स्वलायंकं जूगु तालिम समापन जूगु दु ।

ज्याझ्वलय् न्ववानादिसें मूपाहाँ किपू नगरपालिकाया मेयर रमेश महर्जनं थुगु नेवाः वसः सुयेगु सयेकेगु तालिमया समापन जूगु खःसां धात्थेंया ज्या यायेगु शुरु जूगु धका धयदीगु दु। स्वला जक सयेकाः पूवनी मखुगु धयादिसें मेयर महर्जनं बांलाक सयेकेत अझं निपाः प्यपाः लं सुयेबलय् स्यनेफुगु व अथे स्यन धकाः नुगः मछिंके मज्यूगु धयादिसें मिहिनेत याना वं वं वनकि अथें हे बांलाक सयेके फइगु धका धयादीगु दु। झीगु पहिचान, झीगु म्हसीका नं ल्यंनीगु व आम्दानी नं जुइगु जूगुलिं थुकीयात निरन्तरता बिया ज्या यानादीत सकल ब्वतिकयादीपिंत इनाप यानादिगु खः।

उप मेयर सरस्वती खड्कां विशेषयानां परिवारय् मिसापिं उद्यमशील जुल धाःसा परिवार बांलाइगु धयादिसें सकल नगरबासीयात ल्हाःतय् सीप तयाबीगु नगरपालिकाया दायित्व हे नं जूगुलिं नगरपालिकां थुगु ज्या मद्दिक्क याना च्वनागु न्ह्यथनादिल । वयकलं नेपाल सरकारं सन् २०३० तकया दुने दिगो विकासया लक्ष्य पूवकेगु धकाः अन्तर्राष्ट्रिय प्रतिवद्धता यानातःगु खँय् वाःचायेका सकलसित उगु नेपाल सरकारया प्रतिवद्धतायात थःथःगु थासं ग्वहालि यायेमाःगु खँय् बः बियादिगु खः।

वडा १० या अध्यक्ष अमन महर्जनया सभापतित्वय् जूगु ज्याझ्वलय् वडा ६ या अध्यक्ष न्हुच्छेबहादुर महर्जन वडा नं. १ या अध्यक्ष हर्ष महर्जन, वडा २ या अध्यक्ष रमेशमान डंगोल, वडा ३ या अध्यक्ष राजेन्द्र महर्जन, वडा ४ या अध्यक्ष राजेन्द्र बानियाँ, वडा ९ या अध्यक्ष गंगाराम महर्जनपिंसं दसि पौ लःल्हानादीगु खः । 

Categorized in राष्ट्रिय