येँ महानगरपालिकां थ्व हे वइगु माघ २४ निसे फागुन ५ गते तक कोरोनाविरुद्ध फाइजर खोपया निगुगु मात्रा या ज्याझ्वः सञ्चालन याइगु जुगु दु।

जिल्ला खोप समन्वय समिति येँ माघ २० गतेया निर्णय कथं कामपां फाइजरया निगुगु मात्रा खोप बिइगु सूचं सार्वजनिक याउगु खः।

कामपा स्वास्थ्य विभाग प्रमुख बलराम त्रिपाठीं जारी याउगु सूचं कथं तोके याउगु शनिबाः बाहेक मेगु दिं सुथय् १० बजेनिसे ४ः०० बजे तक खोप ज्याझ्वः सञ्चालन जुइ। थुगु खोप बिइगु निति कामपा ३२ गु हे वडाय् खोप समन्वय समितिया निर्णय कथं विद्यालयय् खोप केन्द्र तोके याना ज्याझ्वः सञ्चालन याइ।

सूचं कथं खोप कायेत लक्षित समूहय् १२ निसे १७ दँ दुपिन्त न्हापागु खोप काउगु २१ दिं दुपिन्त उगु खोप बिइत्यंगु खः।

Categorized in राष्ट्रिय