२०८० चैत्र १६, शुक्रबार

“सःया जः” सांगीतिक ज्याझ्वःया घोषणा

नृपेन्द्रलाल श्रेष्ठ | सिल्लाथ्व षष्ठी ११४२, माघ २४ सोमवाः

यल महानगरपालिका वडा १६ कलाकार समिति व कुटुम्ब ब्याण्डं मंकाः कथं सांगीतिक ज्याझ्वः “सःयाजः” घोषणा याःगु दु।

परम्परागत नापं आधुनिक संगीत व थुगु ख्यलय् समर्पित जुयाः च्वयादीपिं कलाकारपिनिगु नितिं ज्या व ज्याझ्वः न्ह्याकाः नमूना वडाकथं उल्लेख जुयाच्वंगु वडां १६ वडाया कलाकार समिति, कुटुम्बनापं प्राजेक्ट बाजा नेपाल, वाद्यशिरोमणी घराना थेंजाःगु सांगीतिक पुचःया प्रस्तुति दइगु थुगु ज्याझ्वलय् लोकंह्वाःपिं व न्हूपिं कलाकारपिनिगु म्ये नं थीथी नेवाः बाजनय् बिस्कं पहलं निर्माण जुइ।

उलेज्या ज्याझ्वलय् लसकुस यासें समितिया संयोजक सुरजवीर बज्राचार्यं कला क्षेत्रय् मेगु छगू नमूना ज्याझ्वः न्ह्यब्वयेगु नितिं वडाया तत्परतां कलाकारपिन्त अतिकं उत्साहित याःगु खँ कनादिल।

कुटुम्बया सल्लाहकार मंगल महर्जनं संसारय् न्ह्याथाय् वनाः कला न्ह्यब्वःसां थुगु सांगीतिक पुचः नामं धाःथें थः खः । व ल्याखं थुगु ज्याझ्वः नेवाः संगीतया नितिं हे खः धयादिल। ज्याझ्वलय् १६ वडा अध्यक्ष निर्मलरत्न शाक्यं नेपाः च्यानलपाखें प्रशारण जुइगु थुगु सांगीतिक ज्याझ्वलय् वादन व गायन दुथ्याइगु खँ कनादिलसा टेलिभिजन ज्याझ्वःलिसें त्वाःत्वालय् नं थीथीकथं ज्या यानावनेगु खँ नं न्ह्यथनादिल।

वडापाखें कलाकार उत्पादनया नितिं कला स्यनाकुथि (पाठशाला) शुरु जुइत्यंगु नं वयकलं न्ह्यथनादिल। वडा १६ पाखें कलाकार समिति नीस्वनाः येँया पुन्हीया लसताय् येँया हना सांस्कृतिक ज्याझ्वः, १६ वडा ब्यापि म्ये व हुलाप्याखं कासा ग्वसाः ग्वःगु खःसा आः उगु कासाया टप टेन कासामिपिन्त तालिम बीगु ज्या जुयाच्वंगु जुल।

Categorized in मनोरन्जन