वाःया न्हापागु दिं आइतबाः ४० अंकं घटे जुगु शेयर बजाः सोमबाः धासा दोहोरो अंकं सुधार जुगु दु।

थौं सोमबाः शेयर कारोबार मापक नेप्से परिसूचक १५ दशमलव ६९ अंकं बढे जुया २ हजार ८ सय ५१ दशमलव ८६ अंकय् थ्यंगु दु। नेप्से परिसूचक नाप ‘क’ वर्गया कम्पनीपिनिगु कारोबार मापन याइगु सेन्सेटिभ परिसूचक न ३.०५ अंकं बढे जुगु दु।

नेप्से व सेन्सेटिभ परिसूचक निगुलि सुधार जूसा कारोबार रकम धासा उत्साह खनेमदु। आइतबाः स्वया थौं सोमबाः कारोबार रकम घटे जुगु दु।

आइतबाः करिब ६ अर्ब थ्यःगु दु सा शेयर कारोबार रकम सोमबाः धासा ५ अर्बय् सीमित जुगु दु। न्हिच्छियकं ६६ हजार ११३ कारोबारपाखे २२४ कम्पनीया ९५ लाख १२ हजार ५ सय ८० कित्ता शेयर किनबेच जूगु खः।

उगु कारोबार रकम ५ अर्ब २ करोड २० लाख १७ लाख १८१ रुपैयाँय् सीमित जुगु खः।

Categorized in राष्ट्रिय