प्रधानन्यायाधीश चोलेन्द्रशमशेर जबराविरुद्ध संसदय् महाअभियोग प्रस्ताव दर्ता याउगु दु।

सत्तारुढ न्यागु गठबन्धनया सांसदपिन्स थौं आइतबाः सुथय् ११ बजे जुया १० मिनेटय् संसद सचिवालय महाअभियोग प्रस्ताव दर्ता याउगु खः।

माओवादी केन्द्रया प्रमुख सचेतक देव गुरुङ, नेपाली कांग्रेस सचेतक पुष्प भुसाल व नेकपा एकीकृत समाजवादीया प्रमुख सचेतक जीवनराम श्रेष्ठ प्रस्तावक जुगु महाअभियोग प्रस्तावय् कानुनमन्त्री दिलेन्द्रप्रसाद बडूनाप ९८ म्ह सांसदपिन्स हस्ताक्षर याउगु खः।

महाअभियोग तयेमागु आधार व कारण धासे २१ गु बुँदा समावेश याउगु खः। जबराया राजीनामा माग यासे नेपाल बार एशोसिएसनं ताःईनिसे आन्दोलन यानावयाच्वंगु खः।

सर्वोच्च अदालतया न्यायाधीशपिन्स ताः ईनिसे इजलास बहिस्कार यानावयाच्वंगु खः। सर्वोच्च अदालतया नियमावली संशोधन यासे गोला प्रक्रियापाखे पेशी तोके यायेवं न्यायाधीशपि बेञ्चय् लिहावंगु खः।

Categorized in राष्ट्रिय