२०७९ आषाढ १४, मंगलबार

ख्यालिजुजु मदनकृष्ण श्रेष्ठया ज्वरा ज्वरा पर्सि बियां म्ये रिकर्डिङ जुल

लहनान्युज | सिल्लाथ्व चतुर्दशी ११४२, फागुन ३ मंगलवाः

ख्यालिजुजु मदनकृष्ण श्रेष्ठया तसकं लोकंह्वाःगु छपु म्ये आः हाकन रिकर्डिङ जुयाः पिहाँ वइगु जूगु दु।

रेकर्डिंग मजूयाच्वंगु नेपालभाषाया थुगु लोकंह्वाःगु म्ये ‘ज्वरा ज्वरा पर्सि बियां छं छाय् मसिना’ बोलया म्ये छुं ई न्ह्यः जक हरिशरण सायमिया स्ट्रिङ्स रेकर्डिंग स्टुडियो, अनामनगरय् जूगु दु।

निम्ह कलाः ब्याहा यानातःम्ह मिजंया समस्यायात धाचू रसय् धालेयानाः च्वयातःगु थुगु म्येया बारे ख्यालि जुजु श्रेष्ठं धयादी कथं वय्कः सन् १९९० स फलोरिडाय् झायादीगु इलय् गंगाबहादुर मालाकारयात नापलानागु व वय्कलं थ्व ‘ज्वरा ज्वरा पर्सि बियां’ म्ये छकूचा हालाः न्यंकादीगु खः।

न्हापा थुगु म्ये ख्यालिजुजु श्रेष्ठ याकःचां हे हालाच्वंगु खःसा आः न्हूगु एरेन्ज कथं रोजी डंगोल श्रेष्ठ व सरीता शाही नं थुकी सः बियादीगु दु । म्येया संगीत संयोजक जीवित जल्मिं थुगु म्ये पारम्परिक नेवाः म्ये शैलीइ यानादीगु खः।

स्वम्हेसिया हालादीगु थुगु म्येया म्युजिक भिडियो नं दयेकेगु ग्वसाः जुयाच्वंगु दुसाः उकिया निंतिं नांजाःम्ह निर्देशक रामकृष्ण खड्गीयात भाला बिइधुंकूगु दुसा आः याकनं हे म्युजिक भिडयोया शुटिङ्ग जुइगु खँ दु।

Categorized in मनोरन्जन