प्रधानमन्त्री शेरबहादुर देउवां राजनीतिक आन्दोलनपाखे वंगु उपलब्धिया रक्षायासे देशयात समृद्ध दयकेत सरकार क्रियाशील जुगु धका धयादीगु दु।

थुगु ज्या सकसिगु सकारात्मक ग्वाहलि माः धका धयादीगु खः। ७२ क्वःगु प्रजातन्त्र दिवसया लसताय् थौं सैनिक मञ्च टुँडिखेलय् जुगु विशेष समारोहय्  सम्बोधन यासे प्रधानमन्त्री देउवां धयादीगु दु, ‘वर्तमान सरकार, प्रतिपक्ष दल, नागरिक समाज, निजी तथा सहकारी क्षेत्र, दातृ निकाय सकसिगु कुतलं देशय् समृद्ध व सुशासनया लँपुइ न्ह्यने यकेत प्रतिबद्ध दु।’

प्रधानमन्त्री देउवां स्थानीय, प्रदेश व संघीय तहया चुनावयात निष्पक्ष, स्वतन्त्र व भयरहित वातावरणय् सम्पन्न जुइमाः धका बःबियादीगु खः।

२००७ सालया राजनीतिक क्रान्तिनिसे २०४६ साल, २०६२÷६३ या जनआन्दोलन लगायतया कारण राजनीतिक रुपं देशय् तधःगु ह्यूपाः वःगु व झीसं स्वतन्त्र देशया सम्मानित सार्वभौम नागरिक जुगु स्मरण न वयकलं यानादीगु दु।

Categorized in राष्ट्रिय