२०८० चैत्र १५, बिहिबार

येँया ए डिभिजन फुटबल क्लव हरेकयात महानगरं १०—१० लाख ग्वाहालि

रसिया श्रेष्ठ | सिल्लागा अष्टमी ११४२, फागुन १२ बिहीवाः

येँ महानगरपालिकां येँया न्यागु ए डिभिजन फुटबल क्लव हरेकयात १० लाख रुपैयाँ अनुदान ग्वाहालि याउगु दु।

महानगरया मेयर विद्यासुन्दर शाक्यं क्लबया अध्यक्षपिन्त अनुदान रकमया चेक हस्तान्तरण याउगु खः। चेक हस्तान्तरणनाप मेयर शाक्यं विजेता फुटबल क्लब हरेकयात ५ लाख रुपैयाँ प्रोत्साहन बिइगु घोषणा याउगु खः।

सहयोग रकम हस्तान्तरणलिपा न्वावसे मेयर शाक्यं, कासाया इलय् खेल प्रतिस्पर्धा वयालिपा सौहाद्रता राजनीतिक क्षेत्रं सयके माःगु पाठ खः धका धयदाीगु खः । ‘कासां सामाजिक व आर्थिक विकास याइ। रोजगारी सिर्जना याइ।’ मेयर शाक्यं धयादीगु दु, ‘अनेक आयाम दुगु कासां स्वस्थ्य सहर निर्माण योगदान बिइ। फुटबल बिश्वय् यक्को यउगु हे कासा खः।

जिमिसं यानागु चिधःगु ग्वाहालीं आन्तरिक प्रतिस्पर्धापाखे बालापि कासामि छनौट यायेत ग्वाहालि जुइ। थथे कासामि पाखे कन्ह्य अन्तरराष्ट्रिय प्रतिस्पर्धापाखे नेपाःया गौरव जुइगु कथं ज्या जुइगु धइगु महानगरं अपेक्षा यानागु दु।’

उगु ज्याझ्वलय् उपमेयर हरिप्रभा खड्गी (श्रेष्ठ) न, कासा जीवनय् दुहावयेवं यक्को मनू तयेगु लजगाय् ह्यूपा वःगु खनेदु धासे, आर्थिक, सामाजिक वा मेमेगु छु न कारणं कासाय् दुहावये धुका पिहावनेमा धका धयादीगु खः। ‘कासा देशया गौरव थकायेगु कासामिपिनिगु मनोबल उच्च थकायेगु राज्यपाखे लगानी थपे यानावनेमाः।’ उपमेयर खड्गी श्रेष्ठं धयादीगु दु, ‘महानगरं जिम्मेवारी पूरा यायेगु कुतः यानागु दु।’

सामाजिक विकास विभागया प्रमुख दीपक अधिकारीया कथं ए डिभिजन क्लबपिन्त २०७५ साल भदौ २५ गते ९ लाख ३० हजार रुपैयाँ सहयोग रकम उपलब्ध ग्वाहालि याना सुरु जुगु खः। अथे २०७६ बैशाख २३ गते बि व सि डिभिजन क्लबयात ३ लाख व २ लाख रुपैयाँ ग्वाहालि रकम लल्हागु खः। वया लिपा सम्झौता कथं शर्त व प्रगतिया आधारय् महानगरं ग्वाहालि यानाथस खः। कासामिपिनिगु न्हि न्हि, व्यायाम व कासामिपिनिगु विकासया लागि कासाय् सहरी जीवन पद्धति दयकेत महानगरं कासाय् लगानी बढे याना यकेगु नीति कयागु दु।

महानगर थःम्हेसिया हे बहुउद्देश्यीय मार्सल आर्ट केन्द्र सञ्चालन याउगु दु। सामुदायिक विद्यालयय् खेलकुदमैत्री दयकेत पूर्वाधारय् लगानी बढे याउगु दु। अथहे फुटबल नाप विविध विधाय् कासाय् ग्वाहालि याना वयाच्वंगु दु।

Categorized in कासा