येँ महानगरं वडा ६ सिमलटार महामृत्युञ्जय द्यःया थाय् नापं किरियापुत्री भवन उलेज्या यानादीगु दु।

महानगरया मेयर विद्यासुन्दर शाक्य, संघीय संसद सदस्य कृष्ण राई, वडाध्यक्ष दीपेन्द्र लामां उगु  किरियापुत्री भवन व जय गुरुदेव भवन उलेज्या यानादीगु खः। संसद विकास कोष, महानगरपालिका, बौद्धनाथ क्षेत्र विकास समिति, उपभोक्ता समितिया लागत सहभागिताय् निगु तल्ला भवन निर्माण याउगु खः। भवनय् छकलं न्यागु परिवारपि किरिया च्वनेगु थाय् दु। निगु तल्ला भवन करिब १२ लाख रुपैयाँ निर्माण याउगु खः।

उगु भवन उलेज्या याये धुका मेयर शाक्यं, वडाय् दुने पार्क व हरियाली प्रवर्धनया लागि यक्को ज्या यानागु दु धका धयादीगु खः। ‘ वडापाखे सम्पन्न जुगु ज्या एकीकृत संगालो महानगरया प्रगति खः। जिमिसं वडा समितिपाखे जुइगु ज्याया लागि सहजीकरण यानागु दु। माग जुगु योजना प्राथमिकताया आधारय् स्वीकृत यानागु दु।’ मेयर शाक्यं धयादीगु दु, ‘तत्काल मयासे मगागु ज्या दु सा अझ न ज्यायायेत ई दु।

सार्वजनिक जग्गा संरक्षण यायेत व पार्क दयकेगु ज्याय् प्राथमिकता बिया वयाच्वनागु दु।’ धका मेयर शाक्यं धयादीगु खः। उगु ज्याझ्वलय् संघीय संसद सदस्य कृष्ण राई व वडाध्यक्ष दीपेन्द्र लामां न थःगु खँ तयादीगु खः।

Categorized in राष्ट्रिय