येँ महानगरपालिकाया मेयर विद्यासुन्दर शाक्यं येँ महानगरपालिकां हःगु नीतियात कार्यान्वयन यायेगु झ्वलय् न्ह्यावना च्वनागु दु धका धयादीगु दु।

येँ महानगर वडा–२२ या वडा भवन उलेज्या यायेगु झ्वलय् अथे धयादीगु खः। ‘जिमिसं नीति, कार्यक्रम व बजेटयात कार्यान्वयन यायेगु कथं न्ह्या वनाच्वनागु दु व उकिइ सफल न जुयाच्वनागु दु,’ धका मेयर शाक्यं धयादीगु खः, ‘गन–गन विवाद जुगु थासय् ज्या याये मखुगु दु। अन अख्तियार व अदालतं ज्या रोके याउगु दु मेथाय् धाःसा ज्या याना क्वचाय् धुकुगु दु।’

मेयर शाक्यं २०७४ सालय् स्थानीय तहया निर्वाचनय् येँ महानगरपालिकां विजयी जुया वये धुका न्हापागु बैठकं हे महानगरपालिकाया केन्द्रीय भवन व दक्को वडा कार्यालय भवन दयकेगु घोषणा यानागु खँ लुमकादीगु खः। ‘नगरसभां उगु नीति कथं बजेट न व्यवस्थापन यानागु दु,’ धका मेयर शाक्यं धयादीगु खः।, ‘महानगरपालिकाया केन्द्रीय भवन व दक्को वडा कार्यालय भवन जिमिगु कार्यकालय् दयकेगु म्हगस खनागु खः।

ताः ई लिपा थौं वडा–२२ या भवन निर्माणया ज्या क्वचाःगु दु। थौं उलेज्या यानागु ।

सम्पदा निर्माण–पुनर्निर्माणया अभियान कोकोकोलाया व्यापार मखु मेयर शाक्यं मेयरं जस काइ धका ज्या स्यकेगु यानाच्वंगु दु। ‘जिमिगु दक्कोनाप सहकार्य याना सम्पदा निर्माण–पुनर्निर्माण व विकास निर्माणया ज्या यायेगु कुतः खःँ,’ धका धयादीसे वयकलं धयादीगु दु, ‘जिं गौरवया साथ धाये। जिमिगु कार्यकालय याउगु दक्को नीतिगत निर्णय सर्वसम्मत रुपं यानागु दु।

‘पेप्सी, फेण्टा, कोकोकोला व्यापारीपिन्स मेपिनिगु बस्तु बालां धका गुवलय् प्रचार मयाः,’ वयकलं धयादीगु दु, ‘जिमिगु न अवस्था न अथे अथे हे खः। सम्पदा निर्माण–पुनर्निर्माण व विकास निर्माणया अभियान पेप्सी, फेण्टा, कोकोकोलाया व्यापार थे मखु। उकिइ बालागु ज्याय् पनेगु मखु ग्वाहालि याये।’ उगु ज्याझ्वलय् उपमेयर हरिप्रभा खड्गी श्रेष्ठ व वडाध्यक्ष चिनिकाजी महर्जनं थःथःगु खँ तयादीगु।

स्थानीय हिराकाजीं अनुदान बिउगु जग्गाय् ३ करोड २० लाखया लागतं अपाङ्गमैत्री खुगु तल्ला वडा भवन निर्माण जुगु खः।

Categorized in राष्ट्रिय