किपू नगरपालिका युवा परिषदया ग्वसालय् किपुलिइ न्हापागु युवा रोजगार सम्मेलन जुत्यःगु दु ।

थ्वहे वइगु चैत्र २४ व २५ गते बिहीवाः व शुक्रवाः निन्हुयंक जुइगु थुगुु सम्मेलनय् रोजगार माःपिं व रोजगार बीपिंत छथाय् चूलाकेगु ह्वःताः बीगु खँ ग्वसाः खलः न धाःगु दु ।

किपूया ल्याय्म्हतय्त रोजगार चूलायेमा धकाः किपू नगरपालिकां  छुं न्हि न्ह्यःजक गठन याःगु युवा परिषद्ं थ्व ज्याझ्वः क्वःछिउगु खः ।

किपू नगरपालिका वडा नं. २ या ऐतिहासिक थाय् क्वाच्वय् थुगु ज्याझ्वःया उलेज्या जुइसा रोजगारया विषयय् हिल टाउन स्कुलय् सहलह (प्यानल डिसकस) जुइगु नं जानकारी ब्यूगु दु।

छगु पत्रकार सम्मेलनय् थुगु ज्याझ्वलय् ब्वति कायेत वइपिंसं थःगु व्यक्तिगत विवरण (बायाडेटा) नं ज्वना वयेत इनाप याःगु दु ।

Categorized in राष्ट्रिय