वइगु स्थानीय तहया चुनावय् उम्मेदवार जुइपिं बहालवाला जनप्रतिनिधितय्सं मनोनयन दर्ता याये न्ह्यः राजीनामा बीमाः धइगु प्रावधान याना किपू नगरपालिकाया मेयर उपमेयर लिसें झिगुलिं वडाया वडाध्यक्षपिंसं धाःसा म्हिगः मंकाः राजीनामा बिउगु दु।

स्थानीय चुनावय् उम्मेदवारी बीपिंसं राजीनामा बीमाः धकाः सर्वोच्चया फैसला वयेवं राजीनामा बिउपिं किपूया जनप्रतिनिधिपिं दकलय् न्हापां जूगु दु।

किपू नगरपालिकाया सभाहलय् म्हिगः छगू पत्रकार सम्मेलन यासें किपू नगरपालिकाया जनप्रतिनिधिपिंसं मंकाः राजीनामा बियागु जानकारी बिउगु खः। पत्रकार सम्मेलनय् न्ववासें किपू नगरपालिकाया प्रमुख रमेश महर्जनं थःपिंसं बिहिवाः हे राजीनामा बियागु खःसां प्राविधिक कारणं शुक्रवाःनिसें राजीनामा लागू जुइगु खँ कनादिल।

राजीनामा बीत याःगु पत्रकार सम्मेलनय् प्रमुख महर्जन, उपप्रमुख सरस्वती रिजाल खडका लिसें वडाध्यक्षपिनि उपस्थिति दुगु खः । वइगु निर्वाचनय् उम्मेदवारी मबीपिं छुं छुं वडा दुजःतय्सं धाःसा राजीनामा बियामदी ।निर्वाचन आयोगं वइगु वैशाख ११ व १२ गते मनोनयन दर्ता यायेगु ज्याझ्वः तयातःगु दुसा मनोनयन दर्ता याये न्ह्यः बहालवाला पदाधिकारीं राजीनामा बीमाःगु व्यवस्था यानातःगु दु ।

राजीनामा घोषणा याये न्ह्यः प्रमुख महर्जनं थःपिनिगु कार्यकाल प्यदँ व झिंछला दुने यानागु थीथी ज्याया जानकारी नं बियादीगु खः । किपुली २०७४ जेठ ८ गते जनप्रतिनिधिपिनि पदबहाली जूगु खः ।

पत्रकार सम्मेलनय् न्ववानादिसें उपमेयर सरस्वती खड्का रिजालं थःपिनिगु कार्यकालय् सुं नं जनप्रतिनिधिं छुं नं कथंया भ्रष्टाचार याःगु मदु धासें थःपिनिगु कार्यकाल भ्रष्टाचारमुक्त कथं न्ह्याःगु खँ धयादिगु खः ।

Categorized in राष्ट्रिय