येँ महानगरया ७५ क्वःगु कार्यपालिका बैठक क्वचाःगु दु। मेयर विद्यासुन्दर शाक्यया अध्यक्षताय् च्वंगु बैठकय् वडाध्यक्ष नाप वडा सदस्यपिन्स राजीनामा बिउगु अवस्थाय् ज्या यायेगु, स्थानीय तह स्वमूल्याङ्कन लगायत विषय निर्णय जुगु खः।

नेपाःया संविधान धारा ११५ या उपदफा ८ य् जनप्रतिनिधि पदय् मदइगु अवस्थाया बारेय् व्यवस्था दु। थथे पदय् मदइगु अवस्थाय् प्रमुखं उपप्रमुख समक्ष नाप उपप्रमुख, वडाध्यक्ष व वडा सदस्यपिन्स प्रमुखयात राजीनामा बिइमाः।

स्थानीय तह सदस्य निर्वाचन २०७९ य् उम्मेदवार जुइत राजीनामा बिइमाःगु अवस्थाय् वडाअध्यक्षनाप दक्को सदस्यं राजीनामा बिलकि वडा सचिवं कार्यवाहक अध्यक्षया हैसियतय् ज्या यायेगु निर्णय याउगु दु। स्थानीय सरकार सञ्चालन ऐनया दफा ११६ य् कार्यवाहक जुया ज्या यायेगु अवस्था सम्बन्धी व्यवस्था दु।

उकिइ वडाध्यक्षं राजीनामा बिउगुसा, वडा सदस्यमध्ये कार्यवाहक बिइफइ। दक्को जनप्रतिनिधिपिन्स राजीनामा बिउसा कार्यवाहक अध्यक्षया विषय कार्यपालिकाया बैठकं निर्णय यायेफु। नन्दी रात्री माध्यमिक विद्यालय, नक्सालय् राजेश हुमागाईँ व महेन्द्र बौद्ध माध्यमिक विद्यालयय् धर्मेन्द्र खकुरेलयात प्रधानाध्यापकय् नियुक्ति याउगु बैठकं अनुमोदन याउगु दु।

विद्यालय निरीक्षक, विज्ञ व विद्यालय व्यवस्थापन समितिया अध्यक्ष दुगु स्वम्हेसिया शिफारिस समितिपाखे शिफारिस जुयावंम्ह उम्मेदवारयात शिक्षा विभागं कार्यपालिकाय् पेश याउगु खः। बैठकय् उपप्रमुख हरिप्रभा खड्गी श्रेष्ठ, प्रमुख प्रशासकीय अधिकृत लोकनाथ पौड्यालनाप अधिकारीपि न सहभागी दुगु खः।

Categorized in राष्ट्रिय