येँ महानगरपालिकाय् नेकपा एमालेपाखे उपमेयर पदया उम्मेद्वार जुयादीम्ह सुनिता डंगोलं थःगु उम्मेद्वारीं ल्याय्म्ह व मिसापिनिगु भावनाया प्रतिनिधित्व याइ धका धाउगु दु।

मेयर पदय् स्वतन्त्र उम्मेद्वारी बिइगु घोषणायाम्ह डंगोलयात एमाले न उपमेयरया उम्मेद्वार दयकेगु निर्णय याउगु खः। एमालेया निर्णयलिपा डंगोलं राजनीति ख्यलय् थःगु न्हापागु पलाः खः धका धाउगु खः।

बक्तव्य जारी यासे उपमेयर पदय् थःगु उम्मेद्वारीं ल्याय्म्ह, मिसा व सामाजिक–सांस्कृतिक अभियान्ता लगायत येँ च्वपिनिगु भावना सम्बोधन जुगु उल्लेख याउगु दु।

‘‘दकलय् तधःगु पार्टी न जितः विश्वास याना उपमेयरया जिम्मेवारी बिउगु धइगु जितः जक मखु, ल्याय्म्ह, मिसा, सामाजिक–सांस्कृतिक अभियान्ता लगायत सकल येँ च्वपिनिगु भावना प्रतिनिधित्व जुइगु कथं ल्याय्म्हपिन्त उपहारय लल्हागु ह्वताः वःगु कथं कयागु’, डंगोलं च्वंगु दु।

Categorized in राष्ट्रिय