निर्वाचन आयोगं उम्मेदवार व राजनीतिक दलयात लक्षित याना सामाजिक सञ्जालय् गलत सूचं व द्वेषपूर्ण अभिव्यक्ति बिलकि कारबाही यायेगु ख्याच्वः बिउगु दु।

आइतबाः छगु विज्ञप्ति जारी यासे आयोगं उम्मेदवार व राजनीतिक दलयात लक्षित याना मखुगु, भ्रामक, चरित्र हत्या जुइगु, व्यक्तिगत लाञ्छना बिइगु, मानहानी जुइगु कथं सामग्री सामाजिक सञ्जालय् पोष्ट जुया निर्वाचनय् स्वच्छता, स्वतन्त्रता व गरिमाय् आँच वइ धका धाउगु दु।

थज्यागु ज्यायातकि निर्वाचन आचार संहिता विपरीत जुइगु व आयोगं कारबाही याइ धका प्रवक्ता शाालिग्राम शर्मा पौडेलं धाउगु दु। निर्वाचनया इलय मखुगु सूचं दुष्प्रचार व द्वेषपूर्ण अभिव्यक्ति बिलकि आचार संहिता उल्लंघन याउगु कथं काइगु निर्वाचन आयोग ऐन २०७३ दफा २३ बमोजिम कारबाही यायेगु धका आयोगं धाउगु दु। दफा २३ य् आयोगया निर्देशन अखं ज्या याइपिन्त १ लाख रुपैयाँ तक जरिवानाया व्यवस्था दु ।

आयोगं आम सञ्चार माध्यमपाखे मखुगु हुने मिथ्या सूचं, दुष्प्रचार व द्वेषपूर्ण अभिव्यक्ति अनुगमन यायेत प्रेस काउन्सिल नेपाल व नेपाल पत्रकार महासंघयात निर्देशन बिउगु दु। थज्यागु ज्या रोके यायेत फेसबुक, ट्विटर, टिकटक, भाइबर व गुगलया कार्यालयनाप सम्पर्क स्थापना व सहकार्यया लागि कुतः जुगु दु धका आयोगं धाउगु दु।

Categorized in राष्ट्रिय