२०७९ आषाढ १४, मंगलबार

सकसिगु भावनाया सम्मान जुइकथं ज्या याय् –केशव स्थापित

नृपेन्दलाल श्रेष्ठ | बछलाथ्व षष्ठी ११४२, बैसाख २४ सनिवाः

जि न्हापा न्हूम्ह उम्मेदवारया रुपय् निर्वाचनय् दनाबलय् बांलाःगु भोट हयाः त्याकागु खः। आः ला जिं थः मेयर जुयाबलय् यानागु ज्यां जनताया न्ह्यःने प्रमाणित जुइधुंकल।
 
आः ला जि त्याइगु निश्चित हे दु । थ्वयां न्ह्यःया चुनावय् हे मेयरया आकांक्षीइ जिगु नं नां दुगु खः। तर पार्टीं ग्वहालिमि कथं ज्या या धाल। जिं न्यनाकथं उगु इलय् क्षमता मदयाः मखसें, निरन्तरता मदयाः जितः ग्वहालिमिया भूमिकाय् तःगु खः। थुगुसी चुनावय् न्ह्यःने वयागु दु। जिं न्हू न्हूगु बिचाः हय्गु याना, सामाजिक विषय ल्ह्वनेगु याना । घोषणा यातकि सफल मजूतल्ले जि सुंक च्वनीम्ह मनू मखु । 
 
आः पार्टीं पिकाःगु घोषणापत्र कार्यान्वयन याय्त जिं अपनत्व काय्माः। व्यवहारय् छुं उखेथुखे जुइफु, छुं पाय्फु तर, घोषणा यानागु खँ लागू याय्गु हे खः। ज्या यानावनेबलय् पंगःत वइ जिं स्यू, जिं भोगे यानावयागु हे दु। माइतीघर मण्डला दय्काबलय् नं विरोध जूगु खः। मेपिन्सं जक मखु, पार्टी दुनं हे विरोध जूगु खः । सछि दँ पुलांगु छेँ थुनेमज्यू धाःगु खः।
 
६÷७ करोड खर्च यानाः पार्क दय्कल धाल तर, थौं माइतीघर मण्डला गौरवया विषय जुल। माइतीघर मन्डला थौं लोकतन्त्र चोकया रुपय् विकास जुइधुंकल। अथे हे, जिं राजधानीइ सडक पार याय्त दक्कले न्हापां आकाशे पुल नं दय्कागु खः। उबले नं माधव नेपालं विरोध याःगु खः। आः थौं आकाशे पुलं यानाः लँजुवाःतय्त गुलि अःपुल। गाडी ब्वाकाच्वंथाय् मनूत ग्याक्क ग्याक्क, लँ छकः त्वाःल्हाय्त रिस्क कयाः जुइम्वाःल आः। बांलाःगु ज्या खःसा, येँ महानगरया आवश्यकता खःसा याय्गु हे खः । ब्रम्हं खनकि याय्गु हे खः।
 
येँ महानगर सकसित छथाय् थनीगु भूमि खः। अय्जूगुलिं थन सकसिगु संस्कृति विकास याय्गु खः। मनूतय्सं धाय्त ला येँय् दुने पिनेयापिं मनूत निषेध याय्माल तकं धयाच्वन। तर राजधानी जुइधुंकाः पिनं मनूत वइगु स्वाभाविक खः। बरु, व्यवस्थापन गथे यानाः याय्गु धइगु खँ खः। व्यवस्थापनया सवालय् न्हापा नं जिं ज्या यानाः क्यने हे धुन। येँयात गुकथं व्यवस्थापन याय्गु धइगु भिजन जिके दु। थन बहुजाति, बहुभाषा, बहुसंस्कृति दु। सकसिगु चालचलन, रितिरिवाज, रहनसहन सकतां पाः। जि त्यानाः वय्धुंकाः व हे कथं सकसिगु सम्मान जुइकथं, सकसिगु विकास जुइकथं ज्या याय्।
 
आः स्थानीय नेपालभाषाया खँय् नं जि प्रमाणित हे खः नि, मखुला ? जि मेयर जुयाच्वनागु इलय् हे खः, दक्कले न्हापां स्थानीय निकायलय् स्थानीय भाय्यात कामकाजी भाषाया मान्यता बीमाः धकाः येँ महानगरय् नेपालभाषायात मान्यता बियागु। थुकिया विरुद्ध मुद्दा नं लात, मुद्दा नं ल्वानागु खः। तर उगु इलय् झी बुइमाल। आः ला लोकतन्त्रय् झीत लँ चालेधुंकल। येँ महानगर दुनेया स्कूलय् स्थानीय मातृभाषां स्थानीय पाठ्यक्रम लागू जुइधुंकल। उकियात स्थापित याय्त नं केशव स्थापितं ज्या याइ।
 
आः थ्व दक्वं ज्या याय्त जि त्याइला धकाः न्ह्यसः तयाच्वंपिं नं मदुगु मखु। न्हापा थन राजधानीइ जिपिं कम्युनिष्टतय्त प्रवेश निषेध दुगु खः तर, जिमिसं ला त्याका। आः थुगुसी ला जिगु प्रतिस्पर्धा हे मदु। आः नेपाली कांग्रेसं छु धकाः भोट फ्वनेगु ? फल्नाया भौ धाय्गु ला ? वय्कः फल्नाया जहान धाय्गु बाहेक राजधानी व देशय् छु योगदान दु ? कांग्रेसया घोषणापत्र स्वया, केपी ओलीयात सराः बियातःगु बाहेक छुं मखना। आः छु केपी ओलीयात सराः बियाः भोट वइला ? त्याइम्ह जि हे खः, ढुक्क जुयादिसँ।