थःम्हेसिया बियागु समाचार जक समाचार, मेपिन्सं ब्यूगु समाचार प्रायोजित खःला?
नृपेन्दलाल श्रेष्ठ | बछलाथ्व नवमी ११४२, बैसाख २७ मंगलवाः
छु दिं न्ह्यः जक नेवाः मिसा दबुया अध्यक्ष रश्मिला प्रजापतिजु सामाजिक संञ्जालय् च्वयादीगुलि लिसः बिइगु कुतः यानागु दु।
मेयर पदया उम्मेदवार केशव स्थापितलिसे स्वानाः छिं नेवाः पत्रकारतय्त बियादीगु द्वपं तसकं क्वह्यं । नेवाः पत्रकारतय्त द्वपं बियाः छिं ल्ह्वनादीगु छुं प्रशंगया लिसः बियागु दु :
नेवाः पत्रकारतय्सं केशव स्थापितं ब्यूगु प्रायोजित समाचार छापे यात धइगु द्वपं छिं बियादीगु दु । सञ्चार माध्यमय् सुं छम्हेसिनं बी धुंकाः हे समाचार छापे जुइगु खः । समाचार बीम्ह मनू वा संस्था समाचारया स्रोत खः । स्रोत बिना समाचार थः हे उत्पादन जुइमखु । गुगुं स्रोत गोप्य जुइ, गुगुं खुल्ला । अय्जुयाः समाचार सुनां बिल धइगु महत्वपूर्ण खँ मखु, प्रकाशित समाचार सत्य खः कि झुठ धइगु खँ प्रमुख खः । गुगुं समाचारया स्रोत छि जुयाच्वन सा, गुगुंया स्रोत केशव स्थापित वा वय्कःया मनूत जुयाच्वन । छिं बियादीगु समाचार जक समाचार, मेपिन्सं ब्यूगु समाचार प्रायोजित गुकथं जुइ ?
समाचारया बारे छिं अनेक द्वपं ब्यूसां उगु समाचारय् उल्लेखित विवरणया खण्डन धाःसा आःतक यानादीगु मदुनि । प्रकाशित समाचारय् येँ महानगरपालिकाया तत्कालीन कर्मचारीतय्सं छि विरुद्ध आन्दोलन याःगु, आन्दोलन साम्य याय्त येँ मपाय् ज्या यानाच्वंपिं थीथी कर्मचारी युनियनलिसेंया बैठक च्वंगु, बैठकं छिं कारवाही याय्गु निर्णय याःगु, हनुमानढोका प्रमुखं चीकूगु, छानबिन समिति गठन याःगु खँ उल्लेख याःगु दु । बैठकं निर्णय याःगु माइन्युटया फोटोकपीलिसें समाचारय् उल्लेख याःगु दु । छिं आःतक उकिया खण्डन यानामदीनि ।तत्कालीन येँ मपाया कर्मचारीतय्सं छि विरुद्ध आन्दोलन याःगु खः कि मखु ? व हे आन्दोलनं छितः चीकेगु निर्णय याःगु खः कि मखु ? छितः छानबिन याःगु खः कि मखु ? फुसा सप्रमाण थुकिया लिसः बियादिसँ ।
छितः अवकाश ब्यूगु पत्रमा छितः छु द्वपं ब्यूगु खः, व उल्लेख याःगु मदु धकाः छि हालादिल । छुं नं अवकाश पत्र वा नियुक्ति पत्रय् दक्वं विवरण सीदय्का तइमखु, थ्व छिं सीमाःगु विषय खः । यदि अवकाश पत्रय् हे छिं यानादीगु दक्वं कर्तुतहरू सीदय्क च्वल धाःसा भविष्यय् छि गनं नं ज्या याय् योग्य जुइमखु । कर्मचारीयात भविष्यय् मेथाय् ज्या याय्त पंगः मजुइमा धकाः नं अवकाश पत्रय् दक्वं खँ सीदय्केगु याइमखु ।
यदि छितः ब्यूगु अवकाश पत्र अपूर्ण खः वा उलिया हे भरय् छितः जागिरं लिकाय् फइमखु सा छिं उगु अवकाश पत्रयात हे आधार नालाः उगु हे इलय् छाय् अदालत मझायागु ? उगु इलय् मेपिं नं कर्मचारीत थःत ब्यूगु अवकाशविरुद्ध अदालत वनेगु चलन ला न्ह्याय्धुंकूगु खःसा उकथं अदालत वंपिं गुलिखे कर्मचारीतय्सं अदालतं न्याय नं चूलाकूगु खः ।छितः अन्याय जूगु खःसा न्यायया लागिं छि छाय् अदालत मझायागु ? अवकाशविरुद्ध अदालत मवंसे मेगु कथंया द्वपं ब्यूगुलिं छिगु दुर्नियत खनेदु ।
केशव स्थापितं नेवाः पत्रकारतय्त होटल एलो प्यागोडाय् नापलाःगु खँय् नं छिगु आपत्ति खनेदत । थुलि सामान्य खँ छिं सीमाःगु खः, चुनावय् दंम्ह छम्ह उम्मेदवारं पत्रकारतय्त सःताः थःगु खँ तय्गु छगू स्वाभाविक प्रक्रिया खः । थ्व ला वय्कःया कर्तव्य नं खः व आवश्यकता नं । सुं नं उम्मेदवारं थथे याय्फु, याय् नं माः । थुकी आपत्ति क्यनेमाःगु छुं हे आवश्यकता मदु ।
केशव स्थापितं नेवाः पत्रकारतय्त काठमाडौं भ्यू टावर दय्केधुंकाः अन छकू अफिस क्वथा बीगु प्रलोभन बिल धासें छिं उकियात नं नकारात्मक रुपं प्रस्तुत यानादिल । छगू ज्याकू तकं मदयाः जुयाच्वंपिं नेवाः पत्रकारतय्त सुनां अफिस क्वथा उपलब्ध याके धाःसा व ला बांलाःगु हे खँ जुल । छि थुज्वःम्ह नेवाः हकहितया हे लागिं गठित नेवाःतय् राष्ट्रिय संगठन नेवाः देय् दबूया उपाध्यक्षया लागिं ला थ्व झन हे लसताया खँ जुइमाःगु खः तर, थःत मयःम्ह मनुखं ब्यूगु आश्वासन जूगुलिं छिं उकियात नं नकारात्मक रुपं कयादिल । छि गुलि व्यक्तिवादी धइगु थुकिं सीदु ।
नेवाः समाजया उन्नति व प्रगतिया लागिं खटेजुयाच्वंपिं नेवाः पत्रकारतय्त थज्याःगु क्वह्यंगु द्वपं ब्युगु हुनिं छि नेवाः देय् दबूया उपाध्यक्ष जुइ योग्य मजू धइगु प्रस्ट जू । अथेसां, उगु नेवाः पत्रकार मुनां केशव स्थापितं अज्याःगु छुं हे आश्वासन मब्यूगु बरु नेपालभाषा मंकाः खलःलिसें नेवाः व मेगु जनजातितय् लागिं क्वथा उपलब्ध याकेगु व उगु भवनया नां हे ‘नेपाल युनिटी टावर’ तय्गु धकाः बिचाः तयादीगु जानकारी बियाच्वना ।
केशव स्थापितं नेवाः पत्रकारतय्त धेबा नकूगु द्वपं नं छिं बियादीगु दु । दु सा थुकिंया छुं प्रमाण बियादिसँ, अथे ला, बिना प्रमाण द्वपं बीगु छिगु बानी हे खः । थ्व द्वपंया छिं लिसः बी हे माः ।
