नेवाः तयेगु हक अधिकारया निति ज्या यानाच्वंगु संस्था वा मनू तयेत लल्हाना वयाच्वंगु नेवाः अधिकार सिरपा थौं नेवाः तयेगु राष्ट्रिय संगठन नेवाः देय् दबूयात लल्हागु दु।

थौं छगु ज्याझ्वः दथुइ ज्याझ्वःया मूपाँहा जनकबि दुर्गालाल श्रेष्ठं देय् दबूया अध्यक्ष पबित्र बज्राचार्यं लल्हाना कयादीगु खः। अथेहे नगद सिरपाया दाता मोनिही श्रेष्ठं लल्हानादीगु खः। सिरपाः लल्हाना कायेधुका देय् दबूया अध्यक्ष पवित्र बज्राचार्यं नेवाः देय् दबू थौंतक थन थ्यकूपि सकसित सुभाय् बियादीगु खः। अथेहे मूपाँहा जनकवि श्रेष्ठं थौं ई ह्यपाः हयेत हथाय् चाय् धुकूगु दु धका धका धयादीगु खः।

सभाया सभाध्यक्षय् डा. महेशमान श्रेष्ठं थःजक नेवाः अधिकारया निति मगाना पुरस्कार हे स्थापना याना न्ह्या वनागु धका धयादीगु खः। समितिया दुजः शाक्य सुरेनं लसकुस यानादीगु खःसा पुरस्कार छनौट समितिया संयोजक डा. पुष्प राज राजकणिर्कारं सिरपाःया बिषय न्ववानादिगु खः।

समितिया सदस्य डा. मनोजमान श्रेष्ठं सुभाय् बियादीगु खःसा ज्याझ्वः समितिया सदस्य सुरेश मानन्धरं संचालन  यानादीगु खः। डा. महेशमान श्रेष्ठ व मोहिनी श्रेष्ठ इहिपा जुगु ५० दँ जुगु लसताय् सिरपा निस्वंनादीगु खः।

Categorized in राष्ट्रिय