वाङमय शताब्दी पुरुष वरिष्ठ संस्कृतिविद् डा. सत्यमोहन जोशीं यल महानगरया उपमेयरयात संस्कृति अध्ययनया ज्यायात प्राथमिकताय् तय्त इनाप यानादीगु दु।

यल महानगरपालिकाया उपमेयरय् निर्वाचित जुइधुंकाः वंगु आईतबाः थःत नापलाःवःम्ह मञ्जली शाक्य (आस्था) यात भिंतुना ब्युसें शताब्दी पुरुष डा. जोशीं थथे इनाप यानादीगु खः। आः मूर्त व अमूर्त संस्कृति संरक्षणया बहस संस्कृति निरन्तरताया लागिं अक्षयकोष स्थापनाय् जक सीमित जूगु धासें यल महानगर संस्कृति अध्ययन, अनुसन्धानया नितिं ल्याय्म्ह पुस्तायात प्रोत्साहित याय्गु स्तरतक्क थ्यंकेमाःगु संस्कृतिविद् जोशीया धापू खः।

वरिष्ठ संस्कृतिविद् जोशीं धयादिल ‘अमूर्त संस्कृति संरक्षणया लागिं उकिया महत्व, उकी सुलाच्वंगु दर्शन, संस्कृति संस्कार व श्रृजनशीलतायात थुइकेमाः। विविध कोणं उकिया अध्ययन व अनुसन्धान याय्गु ज्यायात प्राथमिकताय् तय्माल, व सम्बन्धी नीति, ज्याझ्वःत हय्माल।’ भाषा, संस्कृति व सम्पदा सभ्यताया ज्यान खःगु धासें जोशीं उकिया संरक्षणय् महानगरपालिकां प्रभावकारी व सशक्त भूमिका निर्वाह याय्माःगुलिइ बः बियादिल।

व इलय् उपमेयर शाक्यं यलया संस्कृति, सम्पदा संरक्षण व प्रर्वद्धन याय्त थम्हं सशक्त व नतिजामुखी भूमिका निर्वाह याय्गु प्रतिबद्धता प्वंकादिल।

वयां लिपा उपमेयर शाक्यं यल महानगरया पूर्व मेयर बुद्धिराज बज्राचार्य, नेपालया अग्रणी वामपन्थी नेतृ स्नेहलता श्रेष्ठयात नं नापलानादीगु खः। पूर्वमेयर बज्राचार्यलिसेया खँल्हाबल्हाय् बज्राचार्यं थःगु अध्यक्षताय् दयाच्वंगु ‘ललितपुर विकासको लागि समाजं’ सम्पदा संरक्षणय् यानावःगु ज्याया बारे धासें आः अर्मूत संस्कृति संरक्षणय् जाय्गु धयादिल। सम्पदा पुनर्निर्माणया थःगु अभियानय् उपमेयरया हैसियतं साथ व ग्वहालि बीत नं वय्कलं इनाप यानादिल।

वामपन्थी नेतृ स्नेहलता श्रेष्ठं जनताया हितयात न्ह्याबलें सर्वोपरी भाःपियाः ज्या याय्त छ्याता बियादिल। चुनाव त्याय्धुंकाः उपमेयर शाक्यं थःत नापलाःवःगुलिं ९० दँया नेतृ श्रेष्ठं तसकं लय्ताःगु खः।उपमेयर शाक्यं निर्वाचन न्ह्यः वय्कःपिं स्वम्हलिसें वामपन्थी नेता सिद्धिलाल सिंहया आशिर्वाद कयाः उम्मेदवारया मनोनयन दर्ता यानादीगु खः।

Categorized in राष्ट्रिय