स्वनिगलय् नेवारी समुदायपिन्स महत्त्वपूर्ण कथं काइगु पचली भैरव जात्रा व पचली भैरवनाप स्वागु किंवदन्तीयात कया सांस्कृतिक नाटक ‘पचली भैरव’ मञ्चन याउगु दु।

वंगु कात्तिक महिनाय् टेकु कौसी थिएटरय् बज्र कला कुञ्जं न्ह्यब्बःगु नाटकय् पचली भैरव व स्थानीय नेवार समुदायया म्ह्याय् मचा रुकमणि दथुइ मतिनाया बाखंयात कया सांस्कृतिक नाप धार्मिक कथं न्ह्यब्बःगु खः।

उगु नाटकयात कया सफू छगु ज्याझ्वः दथुइ पितब्बज्या जुगु दु। शनिबाः जुगु कौसी थिएटरय् येँ महानगरया उपप्रमुख सुनिता डंगोल, संगीतकार राजु सिंह लगायतपिन्स सफू पितब्बज्या यानादीगु खः।

नेपाःया कला, संस्कृति, धार्मिक परम्परागत नाप सांस्कृतिक मौलिकताया संरक्षण व संवद्र्धन यायेगु कथं उद्देश्य कया नाटकयात लिपिबद्ध याना न्हुगु पुस्तासमक्ष न्ह्यब्बगु कथं सफू तयार यानागु धका च्वमि, नाटकया परिकल्पनाकार व निर्देशक चन्द्रमान मुनिकारं धयादीगु खः। येँ सांस्कृतिक सहरया कथं म्हसिगु थनया मूर्त सम्पदा न उलि हे महत्त्वपूर्ण दु धका उपप्रमुख डंगोलं  धयादीगु खः।

Categorized in राष्ट्रिय