२०७९ आश्विन २०, बिहिबार

जसपा येँ जिल्लाया ज्याकू उलेज्या

लहनान्युज | दिल्लागा द्धादशी ११४२, साउन ९ सोमवाः

जनता समाजवादी पार्टी (जसपा) नेपालया येँ जिल्लाया ज्याकू येँया ताम्सिपाखा देक्वय् चाय्कूगु दु।

जसपाया बरिष्ठ नेता लिसें संघिय मामिला तथा सामान्य प्रशासनमन्त्री राजेन्द्र प्रसाद श्रेष्ठं ज्याकूया उलेज्या यानादीगु खः। जसपाया नेता, कार्यकर्तालिसें संचारकर्मीतय् उपस्थितीइ जूगु ज्याझ्वःया दथुइ मन्त्री श्रेष्ठं ज्याकू उलेज्या यानादीगु खः। ज्याकू उलेज्या ज्याझ्वलय् जसपाया केन्द्रिय सदस्य लाल बहादुर तामाङ्ग, आङ्गकाजी शेर्पा, मोहन बराईली, राजन केसी, पन्चलाल महर्जन, राधाकृष्ण महर्जन, लक्ष्मण हुमागाईँ, शोभा बज्राचार्य, अर्जुन लम्साललिसेंया उपस्थिति दुगु ख।

ज्याझ्वलय् न्ववासें नेता श्रेष्ठं ज्याकूयात पार्टीया वैचारिक राजनीतिक केन्द्र कथं विकास याय्माःगु बिचाः तयादिल। पार्टी ज्याकुथिं पार्टीया विचार निर्माणलिसें पार्टी संचालनतक्कया ज्या जुइमाःगु धयादिल। जसपा येँ जिल्ला नायः श्यामकृष्ण प्रजापतिं ताः इलंनिसें जिल्लाया ज्याकू चाय्केत स्वयाच्वनागु खःसां लकडाउनया हुनिं मफयाच्वंगु धासें आः थुगु हे ज्याकुथिं पार्टीया थीथी ज्याझ्वः, योजनालिसें संसदीय चुनावय् वरिष्ठ नेता राजेन्द्र श्रेष्ठया चुनावी प्रचार अभियानयात तच्वय्केगु धयादिल।

जसपा येँ जिल्ला न्वकू श्रीजनमान श्रेष्ठ, नागार्जुन अध्यक्ष अजित पुतुवारलिसें नं ज्याझ्वलय् थःथःगु नुगःखँ तयादीगु खः । न्हापा नेवाः देय् दबूया ज्याकू च्वनाच्वंगु थासय् हे जसपा येँ जिल्लाया ज्याकू चाय्कूगु खः।

Categorized in राजनीति