निलाःनिसे येँया सतकय् फोहर मुनाच्वंगुलि मनूतयेत न्यासि वनेगुलि हे समस्या जुगु दु। सिसडोलया बञ्चरेडाँडाया लँ भिंकेगु समस्या क्यना येँ महानगरपालिका व मेमेगु निजी क्षेत्र तक नियमितरुपं फोहरया व्यवस्थापन यायेगु ज्या मयासे सतकय् न्ह्यःने लाथे वान्छ्वया तःगु दु।

विशेषयाना येँया मुख्य सतक कलङ्की, कालीमाटी, टेकु, अनामनगर, बानेश्वर, थापागाउँ, कोटेश्वर लगायतया थासये ताः ईनिसे फोहर मुनाच्वंगु दु। थ्व हे वंगु साउन ४ गते येँ महानगरपालिकां सार्वजनिक सूचं जारी यासे सतक मर्मत यायेगु ज्या जुयाच्वंगुलि फोहर छवाः तक छेँ न पित मह्येत इनाप याउगु खः।

अथेहे बञ्चरेडाँडाया स्थानीयपिन्स सम्झौता कथं ज्या मजुगुलि वइगु भदौ १ गतेनिसे फोहर व्यवस्थापन मयाकेगु चेतावनी बिउगु दु। इलय् हे सतक मर्मतया ज्या मजुगु, फोहर ज्वना वइगु गाडीइ (लिचड ट्याङ्की) फोहरया लेदो दइगु थलंया व्यवस्था मयाउगु, स्थानीय स्वास्थ्य बीमा, शिक्षाया प्रत्याभूति थे जाःगु विषयबारे बेवास्ता याउगुलि स्थानीयपिन्स फोहर व्यवस्थापन मयाकेगु चेतावनी बिउगु खः।

Categorized in राष्ट्रिय