बौद्ध युवा कमिटी यलया ग्वसालय् जुगु २८क्वःगु स्वनिगः व्यापी बौद्ध वक्तृत्वकला धेंधें बल्लाखय् मैत्रीय युवा संघ ख्वपया प्रमिला धुख्वाः न्हाप लाःगु दु।

अथे हे, शाक्यसिंह बौद्ध परियति शिक्षालयया अनिशा श्रेष्ठ ल्यू, धर्म साकच्छा संघ हःखाया प्रतिष्ठा शाक्य लियांल्यू लाःगु दु। दिपावती पुस्तकालयया पारमी शाक्यं हःपाः सिरपाः त्याकादिल। निर्वाणमूर्ति विहारया सजगता मानन्धरं हःपाः सिरपाः हे त्याकादीगु दु। धेंधें बल्लाखय् १० संघसंस्थाया ब्वति दुगु खः। न्हाप लाःम्हेसित १५ हजार तका सिरपाः ब्यूगु खःसा निम्हेसिगु नितिं पोखराया एकतर्फी हवाजजहाज टिकट नं ब्यूगु खः।

ल्यूयात १० हजार लियांल्यूयात ८ हजार तकालिसें सिन्धुपाल्चोकया भोटेकोशीइ बञ्जी जमया कुपुन तकं ब्यूगु खः । सहभागीतय्त द्वःछि द्वःछि ब्यूगु खः। समाजसेवी मोतिलाल शिल्पकारं सकलसित तका सिरपाः लःल्हानादिल सा वाग्मती प्रदेशया सांसद् शोभा शाक्यं दसिपौ लःल्हानादिल। धेंधें बल्लाःया निर्णायक मण्डलय् भिक्षु विमलो, शाक्य सुरेन, मदनरत्न मानन्धर व नरेशवीर शाक्य दुगु खः।

वयां न्ह्यः धेंधें बल्लाःया उलेज्या यासें संस्कृति, पर्यटन तथा नागरिक उडड्यन मन्त्री जीवनराम श्रेष्ठं थुकथंया रचनात्मक ज्याखं किशोर, किशोरी व ल्याय्म्हतय्त बुद्धया ज्ञान थुइके फइगुलिसें व्यक्तित्व विकास जुइगु बिचाः तयादिल। लुम्बिनी विकास कोषया नायः तकं खःम्ह मन्त्री श्रेष्ठं लु्म्बिनीया गुरुयोजना कथं विश्वया शान्ति र पर्यटन केन्द्र दय्केत थम्हं कुतः यानाच्वनागु जानकारी बियादिल। ज्याझ्वलय् ल्याय्म्ह वर्गयात लक्षित यानाः बुद्ध धर्मया विकासय् महत्वपूर्ण योगदान ब्यूगु धासें कमिटीया संस्थापक राजु शाक्य व पूर्वअध्यक्ष सुनील महर्जनयात सम्मान याःगु खः।

सम्मानित निम्हेसितं कमिटीया नायः सतिश शाक्यं स्वांमाः व भिक्षु कौण्डन्यं दोसल्ला न्यय्कादिल सा मन्त्री श्रेष्ठं हनापौ लःल्हानादिल। सभाय् भिक्षु कौण्डन्य, सम्मानितपाखें कमिटिया पूर्वअध्यक्ष महर्जनं बुद्ध धर्मयात व क्षमता विकासया कोणं स्वय्माःगु धासें ल्याय्म्ह वर्गया रुचि, चाहना व आवश्यकतायात सम्बोधन यानावनेमाःगुलिइ बः बियादिल। ज्याझ्वलय् बौद्ध वक्तृत्वकला पर्व मूगुथिया नायः विश्वन्तर शाक्ययात कार्यकालया सफलताया कामना यासें भिंतुना व बधाई पत्र लःल्हाःगु खः।

२०५० सालनिसें दँय्दसं असार पुन्हिया दिनय् जुयावःगु थ्व ज्याझ्वः कोरोना संक्रमणया हुनिं २०७७ व २०७८ सालय् जक द्यूगु खः।

Categorized in राष्ट्रिय