२०७९ आश्विन २०, बिहिबार

पहिचानया आन्दोलन ताःलाकेत प्रभावकारी माध्यम संकिपा खः’संघीय मामिलामन्त्री राजेन्द्र श्रेष्ठ

लहनान्युज | गुंलाथ्व एकादशी ११४२, साउन २३ सोमवाः

संघीय मामिला तथा सामान्य प्रशासन मन्त्री राजेन्द्रप्रसाद श्रेष्ठं आदिवासी जनजातिया पहिचानया आन्दोलन सफल याय्त संकिपा ख्यलं प्रभावकारी भूमिका म्हितेफइगु धयादीगु दु।

२८औं विश्व आदिवासी दिवसया झ्वलय् नेपाल आदिवासी जनजाति चलचित्र महासंघ व राष्ट्रिय आदिवासी जनजाति महिला मञ्च (निफ) या मंकाः ग्वसालय् जूगु ‘आदिवासी संकिपा क्यनेज्या व सांस्कृतिक ज्याझ्वः’ या उलेज्या यासें मन्त्री श्रेष्ठं थथे धयादीगु खः। उगु इलय् मन्त्री श्रेष्ठं आदिवासी जनजातिया पहिचान, अस्तित्व व आन्दोलनयात सशक्त दय्केत संकिपा दय्केगु नितिं आदिवासी संकिपाकःमितय्त इनाप यानादिल।

ज्याझ्वलय् नेवाः फिल्म सोसाइटीया नायः बिराजकाजी राजोपाध्याय, नेपाल आदिवासी जनजाति महासंघ, संघीय परिषदया नायः गेल्जे लामा शेर्पा, आदिवासी जनजाति महिला महासंघया मूछ्यान्जे शान्ति देवान, राष्ट्रिय आदिवासी जनजाति महिला मञ्चया नायः सुनी लामा, नेपाल आदिवासी जनजाति पत्रकार महासंघ (फोनिज) या संघीय उपाध्यक्ष अमरध्वज लामा, चलचित्र कलाकार संघया नायः रविन्द्र खड्का व ग्वसाः खलः आदिवासी जनजाति चलचित्र महासंघया नायः अमृत सुनुवारलिसें नं आदिवासी मातृभाषी संकिपाकःमितय्सं संकिपामार्फत पहिचानया आन्दोलनयात न्ह्याकाच्वंगु व राज्यं मातृभाषी संकिपाकःमितय्गु सः न्यनेमाःगु खँय् बः ब्यूगु खः।

ज्याझ्वलय् कुमारी प्याखंलिसें तामाङ, थामी, थारू, सुनुवार समुदायपाखें हुुलाप्याखं न्ह्यब्वय्गुलिसें गुरूङ भाषाया संकिपा ‘मि न्होर्वे ट’ क्यंगु खः।

Categorized in मनोरन्जन