शिवपुराणय् मूल रुपं शिव भक्ति व शिव महिमाया विस्तृत वर्णन यानातःगु दु । लगभग दक्वं पुराणय् शिवया त्याग, तपस्या व करुणाया मूर्ति दय्कातःगु दु । शिव अःपुक हे लय्ताइम्ह व मनंतुंगु बीम्ह धयातःगु दु । शिव पुराणय् शिवया जीवन चरित्रय् जः ह्वलाः शिवया रहनसहन, इहिपा व काय्या उत्पतिया विषयस विशेष रुपं वर्णन यानातःगु दु । महाःद्यः न्ह्याबलें कल्याणकारी, लोकोपकारीम्ह खः । त्रिदेवय् शिवयात संहारकर्ता द्यः कथं काइ । शिवया उपासना याय् तसकं अःपु । मेपिं द्यःयात थें शिवयात नस्वाःगु स्वाांमः व साःगु भिंगु मरिचरि म्वाः।

 

महाःद्यःयात नीलः, वेलपत्र, कं दुगु सुनां मनइगु सि धतुरो आदिं हे गाः । महाःद्यःयात बांबालाःगु वसः, तिसा नं म्वाः । वय्कःया अघौर बाबा खः । जटाधारी, गपतय् हिनाच्वंम्ह नाग व रुद्राक्षया माला, शरीरय् धुँया छ्यंगू धारण यानाः म्ह छम्हं मसानया खरानी बुलाः अले ल्हातय् त्रिशूल ज्वनाच्वंम्ह महाःद्यवं सारा विश्वयात हे थःगु पलाःख्वाँय् व डमरुया ध्वनिं प्याखं हुइकादी । अय्जुयाः महाःद्यःयात नटराजया नां नं बियातःगु दु । महाःद्यःया ताण्डव नृत्य तसकं भयावह जूसा नृत्यनाथ नाटेश्वरया सौम्य रुपं नृत्यया प्रादुर्भाव जूगु धाइ । गुगु थौं हलिमय् नृत्यया थीथी कथंया बिचाः विकसित जुयाः न्हूम्हूगु जाः कयाच्वंगु दु ।

 

महाःद्यःया भेषभुषां जीवन व मृत्युया वोध याकी । छ्यनय् गंगा र चन्द्रमा जीवन व कलाया प्रतीक खः । शरीरय् चिताया खरानी मृत्युया प्रतीक जुल । थ्व जीवन गंगाया धारा थें न्ह्याःवनाः अन्त्यय् मृत्युया सागरय् लीन जूवनी । रामचरित मानसय् तुलसी दासं महाःद्यःयात आशिव वेषधारी व नाना वाहन नाना भेषवाला गणतय् अधिपति धाःगु दु । महाःद्यःयात नीलकण्ठ नं धाइ । थुकिया कारण धइगु समुद्र मन्थनया इलय् देवगण अले असुरगण अदभूत व वहुमूल्य तिसा, अलंकार लिसें अमृत ल्हातय् लाकेत व्याकुल जुयाच्वंबलय् कालकुट विष उत्पन्न जूबलय् दक्वं लिचिल। व विषयात ग्रहण याय्त सुं हे तयार मजू । व महाविनाशक विष खनाः दक्वं त्राही त्राहीमाम जुल।

 

उबले महाःद्यवं जगत कल्याणया लागिं व महाविनाशक विष त्वनाः थःगु कथुइ धारण यानादिल व कथु वचुसे च्वन । अय्जुयाः महाःद्यःयात नीलकण्ठ नं धाल । थुकथंयाम्ह परोपकारी शिवया चरित्र वर्णन याय्त हे धकाः शिवपुराणया रचना याःगु खः । थ्व पुराण पूर्णत भक्तिग्रन्थ खः, थुगु पुराणय् कलियुगया पाप कर्मं ग्रसित मनूतय् मुक्तिया लागिं शिव भक्तिया लँ क्यनातःगु दु ।

 

मनुखं निष्काम भावं थःगु दक्वं कर्म महाःद्यःयात अर्पित यानाबीमाः । वेद व उपनिषदय् प्रणव ॐ या जप मुलया आधार धाःगु दु । प्रणवलिसें गायत्री मन्त्रया जप नं शान्ति मोक्षकारक धाइ । तर थुगु पुराणय् च्यागू संहिताया उल्लेख यानातःगु दु, गुगु मोक्षकारक खः ।

 

व संहिता थुकथं दुः

 

१) विशेश्वर संहिता 

२) रुद्र संहिता

३) शत रुद्र संहिता

४) कोटि रुद्र संहिता

५) उमा संहिता

६) कैलाश संहिता

७) वायु संहिता (पूर्वभाग) 

८) वायु संहिता उत्तरभाग