२०७९ आश्विन २०, बिहिबार

कुमारीया किपा तयाः विश्व नेवाःया बेइज्जत जुल ला ?

लहनान्युज | गुंलाथ्व त्रयोदशी ११४२, साउन २५ बुधवाः

अमेरीका विश्व नेवाः सम्मेलन न्ह्याःगुलिसें थुकी हलिंन्यंकया नेवाःतय् छगू उत्साह नं अप्वःगु दुसा छगू चीधंगु धाय् वा बिचाः मयाःगु पलाखं हलिंन्यंक न्यनाच्वंपिं नेवाःतय् दथुइ वहस न्ह्याःगु दु। अले व पलाः पाय्छि खः वा गलत धइगु खँय् नेवाःत थःथः हे ल्वाना नं च्वंगु दु। जुल छु ले धाय्बलय् सम्मेलनया छगू फेशन शो यात। फेशन शोलय् ब्वःगु लनय् नेवाः तजिलजि ब्वय्गु बिचाः आयोजकं याःगु खः धइगु प्रष्ट खनेदु। व झ्वलय् लेहेङ्गाय् कुमारीया किपा तयाबिल।

गुगुं लनय् चिभाःद्यः नं तयाबिल । लं स्वय्बलय् धात्थें बांलाः। मिखा सालाकाः उगु लनं । तर लनय् अथे कुमारीया किपा तल धकाः नेवाःतय्सं हे थुकिया विरोध यानाच्वंगु दु। थुकिया समर्थन याःपिन्सं धाःसा कुमारीया टिसर्ट बजारय् उलिमछि न्याय्गु दु, व लनय् तयाः छु पात धाल । विरोध याःपिन्सं म्हया क्वय्या ब्वय् कुमारी लात, अथे जुयाः कुमारीया अपमान जुल धाल । थ्व खँय् समर्थन याःपिं स्वयां विरोध याःपिं हे अप्वः खनेदु।

थ्वयां न्ह्यः नं छगू ब्यूटि पेजेन्टय् बुंगद्यःया रथया डिजाइनय् लँ दय्काः ब्वःगु दु । उगु इलय् अप्वःसिनं तारीफ हे याःगु खः । विरोध याःपिं खास हे खनेमदु। अथे हे, नेपहपको श्रीपेच धकाः ¥याप ब्याटलया त्याकामियात येँ महानगरपालिकाया मेयर बालेन शाहं पञ्चबुद्ध दुगु मुकुट पुइकाबी धुंकाः तःधंगु हे विरोध जूगु खः। थुकी नं अनलाइन बजारय् छम्ह मिसां उगु मुकुट पुयातःगु किपा तयाः मियातःगु दु, आः नेपहपको श्रीपेच दय्कल धकाः छाय् विरोध याय्माःगु धाःपिं नं पिहांवल। तर अन्ततः, बालेनं माफी हे फ्वनाः व मुकुट लितबीमाल।

थ्व छगू निगू घटना जुल, तर थज्याःगु घटना आः जक जूगु मखु। न्हापा नं जुयावःगु खः । तर मिडियाया सीमित पहुँचबलय् चर्चा नं मजुल, मनूतय्सं सि हे मसिल। तर आः वयाः धाःसा सामाजिक संजालया व्यापकतां चिचीधंगु पलाः नं पलखं हे सकसिगु ल्हातय् ल्हातय् थ्यनीगु अवस्था जुल व न्ह्यागु खँ भाइरल हे जुइगु जुल। हलिं नेवाः दबुलिं याःगु ज्या पाय्छि जू कि मजू व खँ आः थन मल्ह्वना। मात्र खँ थुलि खः कि नेवाःतय्गु तजिलजि, परम्परायात कयाः थज्याःगु ज्याखँ जुइबलय् समर्थन व विरोधय् नेवाःत सार्वजनिक रुपं छाय् ल्वानाच्वनी ?

हाकनं न्ह्यागुं खँ सामाजिक संजालय् पोस्ट यानाः सार्वजनिक रुपं ब्वः हे जक बियाच्वनेगु नं गुलित पाय्छि खः धकाः बिचाः याय्माः ले धइथें च्वं । थ्व खँ तप्यंक हे हलिं नेवाः दबूयात धाःसा बरु याकनं लिच्वः पिहांवइला । हलिं नेवाः दबुलिइ च्वंपिं नेवाःतय्सं लिच्वःयात बिचाः मयाःस् काचाक्क छगू ज्या यात, उकी समर्थन व विरोधय् नेवाःत ल्वानाच्वन। अले थ्व स्वयाः मख्ख जुजुं गैर नेवाःतय्सं नेवाःतय्त लाय्बुयाच्वन ।