लिपागु इलय् चित्तवनय् कोरोना सङ्क्रमण अप्पोया वनेगु सुरु जुगु दु। आःतक सक्रिय सङ्क्रमितपि १०८ म्ह थ्यने धुकुगु दु। स्वास्थ्य कार्यालय चितवनया कथं सङ्क्रमित मध्ये खुम्ह अस्पतालय् १०२ म्ह होम आइसोलेशनय् च्वनाच्वंगु दु।

सक्रिय सङ्क्रमितमध्ये ९० म्ह भरतपुर महानगरपालिका, न्ह्यम्ह खैरेनी नगरपालिका च्वपि खः। अथेहे माडी नगरपालिकाय् छम्ह, रत्ननगर नगरपालिकाय् निम्ह, राप्ती नगरपालिकाय् छम्ह, कालिका नगरपालिकाय् छम्ह सङ्क्रमित जुगु दु धका कार्यालयं धाउगु दु। इच्छाकामना गाउँपालिकाय् खुम्ह सक्रिय सङ्क्रमितपि दु।

जनस्वास्थ्य अधिकृतया कथं असार २२ गतेनिसे जिल्लाय् सङ्क्रमण खनेदुगु खः। अथेहे छम्हेसिगु ज्यान वंगु दु। थ्व नाप उगु जिल्लाय् कोरोनाया कारण सीपि ४५० म्ह थ्यःगु दु धका कार्यालयया तथ्याङ्कय् दु। जिल्लाय् आःतक ३३ हजार ८१४ म्हेसित कोरोना पुष्टि जुइ धुकुगु दु।

Categorized in राष्ट्रिय