निर्वाचन आयोगं नेपाल कम्युनिस्ट पार्टी माओवादी केन्द्रया अध्यक्ष पुष्पकमल दाहाल प्रचण्डयात पालिका चुनावय् खर्चबारे सूचना उपलब्ध बिइत पत्राचार याःगु दु।

प्रचण्डं गाउँपालिका अध्यक्षय् चुनाव त्याकेत उम्मेदवारं १० करोड रुपैयाँ खर्च याःगु धका सार्वजनिक अभिव्यक्ति बिःगु खः। उकिया जानकारी बिइत निर्वाचन आयोगं उगु पौं छ्वःगु खः।

‘वयकलं  चुनावय् सीमा स्वया अप्पो खर्च याःगु अभिव्यक्ति बिइगुलि उकिया सूचना उपलब्ध बिया ग्वाहालि यायेत आयोगं पत्राचार यानागु’ धका आयोगया प्रवक्ता शालिग्राम शर्मा पौडेलं धाःगु दु।

प्रचण्डं वंगु ९ गते कम्युनिस्ट पार्टीया संस्थापक नेता नरबहादुर कर्माचार्यया गुक्वःगु स्मृति दिवसया ज्याझ्वलय् गाउँपालिकाया चुनावय् १० करोडतक खर्च जूगु रिपोर्ट वःगु दु धका धाउगु खः।

निर्वाचन आयोगं पालिका चुनावय् उम्मेदवारं साढे ७ लाख रुपैयाँ तक खर्च यायेफइगु सीमा तोके यानातःगु खः। महानगर मेयर उपमेयरं ७ लाख ५० हजार, उपमहानगर मेयर उपमेयरं ५ लाख ५० हजार, नगरपालिकाया मेयर उपमेयरं ४ लाख ५० हजार व गाउँपालिका अध्यक्ष–उपाध्यक्षं ३ लाख ५० हजार रुपैयाँ चुनावय् प्रचारया खर्च याये दइगु सीमा निर्धारण याःगु खः।

Categorized in राजनीति