यँयाः पर्व स्वयेगु लागिं थुगुसी नं येँ महानगरपालिकां थःपिंलिसे स्वापू दुगु थीथी देय्या नगर प्रमुखपिन्त ब्वनापौ छ्वःगु दु।

येँ महानगरया मेयर बालेन्द्र साहं थुगुसी थीथी देय्या २५ म्ह नगर प्रमुखपिंत यँयाः स्वः वयेगु लागिं ब्वनापौ छ्वये धुकुगु दु। भारत, चीन, अमेरिका, जापान, जर्मनी, दक्षिण कोरिया व उत्तर कोरियाया थीथी नगर प्रमुखपिंत तकं ब्वनापौ छ्वःगु दु।

येँ महानगरपाखें मेयर विद्यासुन्दर शाक्यया पालय् यँयाःयात अन्तर्राष्ट्रिय रुपं प्रचार यायेगु लागिं थीथी नगरया प्रमुखपिंत येँय् ब्वनेगु ज्या जूगु खः।

अथेहे पञ्चाङ्ग निर्णायक विकास समितिपाखें थुगुसी जुइगु यँयाः जात्राया साइत न सार्वजनिक याःगु दु। समितिं बिःगु साइत कथं वइगु भदौ २२ गते बुधवाः सुथय् ७.१७ बजे हनुमानध्वाखाय् यःसिं थनीगु जूगु दु।

भदौ १९ गते सुथय् ७.२४ बजे यःसिंयात नगर प्रवेश याकीगु ज्याझ्वः दु। यःसिं थनेवं येँय् दीप्याखं, लाखे, पुलुकिसि आदि नं पिहां वइ।

भदौ २४ गते कुमारी रथयात्राया क्वःनेयाः, २५ गते थःनेयाः, २९ गते बुधवाः नानिचायाः व वकुन्हु हे बहनी ७.३३ बजे यःसिं क्वःथली।

Categorized in राष्ट्रिय