राष्ट्रिय उपभोक्ता मञ्चं पेट्रोलियम पदार्थया भाः न घटे मयागु धासे आयल निगमविरुद्ध संसदीय समितिइ निवेदन बिःगु दु।

प्रतिनिधिसभा अन्तर्गत उद्योग तथा वाणिज्य व श्रम तथा उपभोक्ता हित समितिइ तत्काल इन्धनया भाः घटे याये माःगु माग यासे मञ्चया अध्यक्ष प्रेमलाल मर्हजनं निवेदन बिःगु दु। छु दिं न्ह्यःनिसे इन्धनया भाः निरन्तर घटे जूसा निगमं भाः घटे मयागुलि निवेदन बिःयागु धका धाःगु दु।

‘अन्तर्राष्ट्रिय बजारय् पट्रोलियम पदार्थया भाः स्वला निसे लगातार घटे जुया वया च्वंगु व इन्डियन आयल कर्पोरेसन तक निला न्ह्यःनिसे नेपाल आयल निगमयात घटे याना हे पट्रोलियम पदार्थ आपूर्ति याना वयाच्वंगु खः। तर न नेपाल आयल निगमं धाःसा थीथी त्वहचिना भाः घटे याःगु मदु,’ धका मञ्चं धागु दु।

निगमं बेइमानी कपटपूर्ण व्यवहार याना उपभोक्तायात ठगे यायेगु ज्या जुयाच्वंगु धासे मञ्चं तत्काल समितिं भाः घटेयाना नागरिकपिन्त राहत बिइमाः धका निवेदनय् उल्लेख याःगु दु।

Categorized in राष्ट्रिय