यल महानगरपालिका वडा नम्बर १८ य् दँच्छियक एकादशी, बुद्धजयन्ती व शिलाचहे कुन्हु मिट होलिडे यायेगु निर्णय याःगु दु।

थौं सोमबाः वडाय् दुने च्वपि ला ब्यावसायी व वडा अध्यक्ष दामोदर खड्का नापं वडाया प्रतिनिधिपिनिगु बैठकं अथे निर्णय याःगु खः। उगु निर्णय कथं वडाय् दुने दँच्छिइ २६ दिं ला मिइगु निषेध जुइगु दु। दँच्छियक २४ दिं एकादशी व निगु तधःगु नखः लाउगु दु।

उगु बैठकया निर्णय कथं ला व्यावसायीपिन्स लसकुस याःगु दु। ला व्यावसायी कृष्णप्रसाद खड्गीं वडा कार्यालयया थुगु निर्णययात सकसिया लसकुस याःगु दु धका धाःगु दु। वयकलं १८ वडा नाप वडा नम्बर २५ न थुगु नियम लागु यायेत इनाप यानादीगु दु। मेम्ह ला व्यावसायी सुविन खड्गीं वडाया निर्णययात कार्यान्वयन जुइत छु ई काइ धका धयादीगु दु।

वडा सचिव निरन श्रेष्ठं निर्णयबारे जानकारी बियादीसे लच्छिया दुने कार्यान्वयन यायेत इनाप यानादीगु दु। वडां दक्को ला व्यावसायपिन्स निर्णययासे ल्हाःचिंतया प्रतिबद्धता याःगु दु धका धयादीगु दु। वडा सदस्य निरज कुँबर व गोपाल डंगोलं निर्णय कार्यान्वयन यायेमाः धक धयादीगु खः।

Categorized in राष्ट्रिय