राष्ट्रिय टिमय् लिहांवल ज्ञानेन्द्र
प्रजित शाक्य | गुंलागा द्धादशी ११४२, भाद्र ८ बुधवाः
नेपाली क्रिकेटय् छगू तःधंगु नां, आः म्हिताच्वंपिं क्रिकेटरमध्ये प्राविधिकरुपं दकले सक्षम ब्याट्सम्यान । स्टाइलिस ब्याट्सम्यानया इमेज दय्कूम्ह क्रिकेटर । तेज व स्पीन निगुलिं बलिङ आक्रमण अःपुक म्हितेफुम्ह । क्रिजय् थानाः अथवा विस्फोटक इनिङ म्हिेतमाःसां व हे नां न्ह्यःने वइ । चौका, छक्का थ्वाय्त माहिर अले न्ह्यागु नं ब्याटिङ सट म्हितेत सक्षम । थ्व दक्वं गुण सु नेपाली क्रिकेटरयाके दु धाःसा छगू हे जक लिसः वइ, ‘ज्ञानेन्द्र मल्ल’ ।
सन् २००६य् १६दँ जक दुबलय् हे चार दिवसीय प्रतियोगिता आइसीसी इन्टरकन्टिनेन्टल कपय् नामिबियाविरुद्ध म्हिताः राष्ट्रिय टिमय् पदार्पण याःम्ह ज्ञानेन्द्रं करीब डेढ दशक राष्ट्रिय टिमया सेवा यात । थ्व दथुइ, ज्ञानेन्द्र च्याला न्ह्यः मैदान दुनेया प्रदर्शनं मखसें मैदान पिनेया घटनां चर्चाय् च्वन । नेपाल क्रिकेट संघं कप्तान पदय् हे दुगु इलय् ज्ञानेन्द्रयात राष्ट्रिय क्रिकेट टिमं लिकाय्धुंकाः नेपाली क्रिकेटय् भुखाय् ब्वःगु खः । ज्ञानेन्दलिसें दिपेन्द्रसिंह ऐरी, सोमपाल कामी व कमलसिंह ऐरीयात अनुशासनहिन ज्या याःगु धासें सन् २०२२या सेन्ट्रल कन्ट्रयाक्टय् सुरुया खुलातक मतय्गु निर्णय यात । ज्ञानेन्द्रया थासय् सन्दीप लामिछाने न्हूम्ह कप्तान जुल । खास यानाः कासामि वर्गीकरणया खँयात कयाः ज्ञानेन्द्रलिसें थुपिं कासामितय्सं मिडियाय् न्ववाःगु खः ।
थुकिं क्यानं आचारसहिंताया उल्लंघन याःगु क्वःछिनाः कासामितय् कासामितय्त कारवाही याःगु खः । ज्ञानेन्द्रलिसें प्यम्ह कासामितय्त कारवाही धुंकाः क्यानया प्यखेरं विरोध जुल । थ्व केस) राजनीतिक रङ्ग नं काल । व धुंकाः ज्ञानेन्द्रलिसें प्यम्हं कासामिया कारवाही लित ला काल तर, छुं श्रृङ्खला धुंकाः ज्ञानेन्द्रयात टिमं लिकात । थ्वव दथुइ, वय्कलं बांलाःगु कासा क्यने नं मफयाच्वंगु खः । ज्ञानेन्द्र विना नेपालं पपुआ न्युगिनी, मलेसिया व जिम्बाब्वे एलिसे घरेलु मैदानय् टि२० व एक दिवसीय श्रृङ्खला म्हितल ।
आइसीसी विश्वकप क्रिकेट लिग त्रिदेशीय श्रृङ्खला म्हितेत अमेरिका व स्टकल्यान्ड वंबलय् नं ज्ञानेन्द्रयात टिमय् मतल । अय्जुयाः आः नेपाली क्रिकेटयात ताः ईतक्क योगदान ब्यूम्ह ज्ञानेन्द्रया कासा जीवन हे फूगु ला मखुला धइगु न्ह्यसः नं दन तर, थ्व दथुइ क्यानं ज्ञानेन्द्रयात केन्या भ्रमणय् दुथ्याकाः थःगु कासा जीवन भिंकेगु ह्वःताः ब्यूगु दु । नेपाली ल्याय्म्ह कासामितय् लगातार कमजोर प्रदर्शन धुंकाः टिमय् अनुभवी कासामिया आवश्यकता महसुस जूबलय् ज्ञानेन्द्र टिमय् लिहांवःगु खः ।
ज्ञानेन्द्रं आः केन्याविरुद्ध न्यागू टि२० व स्वंगू एकदिवसीय श्रृङ्खला म्हिती । गुगु श्रृङ्खला ज्ञानेन्द्रया लागिं तसकं महत्वपूर्ण जुयाच्वंगु दु । थुगु कासाय् अपेक्षा कथं प्रदर्शन क्यनेमफुत धाःसा शायद थ्व ज्ञानेन्द्रया लिपांगु कासा नं जुइफु । यद्यपि न्याला लिपा टिमय् लिहांवःम्ह ज्ञानेन्द्रयात थ्व दथुइ पक्का नं तसकं पित्यानाच्वंगु जुइमाः । ज्ञानेन्द्रया न्ह्यःने अझं छुं दँ राष्ट्रिय टिमया सेवा याय्गु बिचाः दु । अय्जुयाः पक्का नं ज्ञानेन्द्रं थःगु कासा जीवनया उत्तराद्र्धय् वःगु थ्व ह्वःताःयात सितिं वने बी मखु धाःसा पाइमखु । ज्ञानेन्द्रया नं धापू दु, ‘नेपाली टिमया लागिं अझ नं म्हितेगु तःधंगु गर्वया खँ खः । जि छम्ह कासामिया रुपं न्ह्याबलें नं शतप्रतिशत बियाः म्हितेगु याना । थ्व पुनरागमनया लसता केन्याय् बांलाका म्हिताः हने । जिं थःगु जिन्दगी हे टियु मैदानय् बिकागु दु तर, थज्याःगु स्थिति हरेक कासामिया जीवनय् वइगुलिं जि थुकिया सामना याय्त तयार दुगु खः ।’
नेपाली टिमया वर्तमान कप्तान सन्दीप लामिछानें अनुभवी कासामि ज्ञानेन्द्रयाके मेपिं ल्याय्म्ह कासामितय्सं सय्काकाय्गु बांलाःगु ह्वःताः वःगु धयादिल । नेपाल टि२० व एक दिवसीय श्रृङ्खला म्हितेत थौं (मङ्गलबाः) केन्या वनेत्यंगु दु । केन्या एसोसिएट टोलीमध्ये दकले सफल क्रिकेट राष्ट्र खः । सन् १९९६ निसें २०११ तक्क लगातार न्याक्वः एक दिवसीय विश्वकप म्हितूगु केन्या सन् २००३ या एक दिवसीय विश्वकप सेमिफाइनलय् थ्यंगु खः । तर आः केन्याया क्रिकेट बांलाःगु स्थितीइ मदु । अय्जुयाः नं केन्याविरुद्ध नेपाल थ्व श्रृङ्खलाय् दावेदार खः धाःसां पाइमखु ।
नेपाल व केन्या दथुइया कासा धलः
नेपाल व केन्या दथुइ न्यागू टि२० व स्वंगू एक दिवसीय कासाया श्रृङ्खला जुइ । नेपालया केन्या भ्रमण अगस्ट २५ निसें सेप्टेम्बर पाँच तारिखतक्क जुइ । सुरुइ टि२० श्रृङ्खला जुइ । नेपाल व केन्या दथुइ अगस्ट २५ य् न्हापांगु, अगस्ट २६य् निगूगु, अगस्ट २८य् स्वंगूगु, अगस्ट २९य् प्यंगूगु व अगस्ट ३०य् न्यागूगु अले लिपांगु टि२० कासा जुइ । व धुंकाः नेपालया कप्तान सन्दिप सिपिएल म्हितेत वेस्ट इन्डिज वनीगु धाःगु दु ।
अगस्ट ३१ तारिखनिसें न्ह्याइगु सिपिएलय् सन्दिपं जमैका तालावाजं म्हिती ।
सेप्टेम्बर २ तारिखनिसें एकदवसीय श्रृङ्खला न्ह्याइ । केन्या भ्रमणया ज्याझ्वः कथं सेप्टेम्बर ३य् निगूगु अले सेप्टेम्बर ५य् स्वंगूगु व लिपांगु एक दिवसीय कासा म्हिती।
