२०८० चैत्र १६, शुक्रबार

लहना थःगु आज्जुं गलबें विचलित मजुइमा

राजेन्द्रप्रसाद श्रेष्ठ श्रेष्ठ संघीय मामिला तथा सामान्य प्रशासन मन्त्री | यंलाथ्व सप्तमी ११४२, भाद्र १८ शनिवाः

लहना वाःपौया प्यसः ल्याः पिदंगु खँ न्यनेदयाः जि तसकं लय्ताः । नेपालभाषा लिसें नेवाः साहित्य, संस्कृति, सम्पदाया लिसें पहिचान व अधिकारया पक्षय् सः तयावःगु लहना न्ह्याबलें थुकथं हे न्ह्यानाच्वनेफय्मा, थ्व हे भिंतुना देछाना च्वना । 
देय् संघीयताय् वनेधुंकूगु अवस्था, उकिया नापं पहिचानलिसें संघीयताया पक्षय् सः तयावयापिं खः झी ।
 
थुकिया दथुइ संघीयताया अपव्याख्या यानाः व्यवस्थायात विफल क्यनेगु कुतः यानाच्वंगु पुचः नं मदुगु मखु । थज्याःगु अवस्थाय् विशेष यानाः राज्यया प्यंगूगु अङ्ग धयातःगु संचारमाध्यमया विशेष भूमिका दयाच्वनी । संचार माध्यमं खः कथं पाय्छि कथं थःगु भूमिका म्हिताः सत्यतथ्य न्ह्यब्वय्माः, आम नागरिकयात सहि सुचंलिसें सूसुचित याय्गुलिसें सचेत दय्केगु नितिं विशेष भूमिका म्हितेमाः । थौंया दिनय् संचारमाध्यमया थुकथंया भूमिका आवश्यक दनि । 
 
संचार व प्रविधिया विकासलिसें संचारमाध्यमया ल्याः नं व हे कथं अप्वयावंबलय् थन पीत पत्रकारिता नं व हे कथं अप्वया वनाच्वंगु । गलत सुचं प्रवाह यानाः आम नागरिक दथुइ द्वेष न्यंकेगु खँय् सामाजिक संजालया दुरुपयोग नं उलि हे अप्वःगु दु । स्मार्ट मोबाइल छगः ल्हातिइ दतकि फोटो व भिडियो काल, खःगु मखुगुं न्ह्यागुं सामाजिक संजालय् पोस्ट यात व गलत कथंया सन्देशं मनूत भड्के यात । थौंकन्हय् थज्याःगु घटना यक्व जुयाच्वंगु दु । चिचीधंगु ख्याः यानाः ततःधंगु घटना जूगु यक्वं दसु झीगु न्ह्यःने दु । थज्याःगु अवस्थाय् नं स्वच्छ, सन्तुलित व विश्वसनीय पत्रकारिताया महत्वयात झन थकयाब्यूगु दु ।
 
पीत पत्रकारितायात दुरुत्साहित याय्त, जनतायात सहि सुचंलिसें सुसूचित याय्त लहना न्ह्याःवनेमाः । मातृभाषा पत्रकारिताय् व्यावसायिकताया विकास यानावनेगुया लिसें ई कथंया हलंज्वलं न्ह्यब्वयाः आःया ल्याय्म्ह पुस्तायात आकर्षित याय्गु, झीगु भाय् ब्वनेगु कथंया लकस दय्केगु, पहिचानया मुद्दायात सशक्त दय्केत, पहिचानसहितया संघीयताया सहि अर्थ आम नागरिकयात थुइकेगु नितिं लहनां ज्या याय्माः ।
 
थःगु आज्जुं लहना गबलें लिमचिलेमा । लहना न्ह्याबलें नं धिसिलाक्क न्ह्याःवनाच्वने फय्मा । मातृभाषा पत्रकारिताया न्ह्यलुवा जुयाः दनेफय्मा, थ्व हे जिगुपाखें भिन्तुना ।
भिन्तुना भिन्तुना भिन्तुना ।