२०७९ आश्विन २०, बिहिबार

प्यसः मखु, छुं मखुसां प्यद्वः ल्याः थ्यनेमा, लहनायात भिंतुना

राजेन्द्र स्थापित, पत्रकार | यंलाथ्व अष्टमी ११४२, भाद्र १९ आईतवाः

‘व्यवसायिक पत्रकारिता, थौंया आवश्यकता’ धइगु मू आज्जु ज्वनाः पिदनाच्वंगु नेपालभाषाया वाःपौ प्यसः ल्याः थ्यंगुलिं दकसिबे न्हापां लसता प्वंकाच्वना नापं पत्रिकाया प्रकाशन संस्था, सम्पादन पुचः, थुकी च्वसु, बुखँ च्वयाः व थ्व वाःपौ पिथनेत थीथी कथं ग्वहालि यानावःपिं अले सकलें ज्याकःमिपिन्त भिंतुना देछाना च्वना !
 
अथें नं नेपाल भाषाया माध्यमं पत्रकारिता याय्गु व अझ धाय् पत्रकारिताया ख्यलय् पलाः लिमज्याःसे मदिक्क न्ह्याःवने फूगु धैगु नं छगूकथं सफल् जूगु भाःपीमा, छाय्धाःसा नेवाः जूगुया नातां, जातीय व भाषिक भावनाया लिधंसाय् यक्वस्यां पत्रकारिता याय्धुंकुगु दु, याना च्वंगु दु, कन्हय् नं याइतिनि । तर, थुकथं याइगु पत्रकारिता व्यवसायिक जुइमफइगु हुनिं मदिक्क न्ह्याःवने मफयाच्वंगु दसु झीगु न्ह्यःने यक्व दु । नेवाः पत्रिकात स्वइपिं, ब्वनीपिं ब्वँमितय्गु ल्याः म्ह्वः मखु, तर पत्रकारिता याइपिं व पत्रिका पिकाइपिं हे मदिक्क न्ह्याःवने मफयाच्वंगु हुनिं ब्वँमितय्गु ल्याः म्ह्वः जुयामवंसां ईया ल्याखं गुलि अप्वया वनेमाःगु खः उकथं अप्वया वनाच्वंगु मदु ।
 
झीसं न्हूगु पुस्ताया ल्यासेल्याय्म्हतय्त कत्ताय् मफुत, साला तय् मफुत । उपिं गैर नेवाः भाषं पिदनाच्वंगु पत्रिकाय् निर्भर जूवन । थुकिया छगू तःधंगु कारण झीसं पिकाय्गु पत्रिका ईकथं व हलिमय बिज्ञान व प्रविधिइ वःगु ह्यूपाःनाप ब्वाँय् वने मफुगु नं खः । थथे मजूगुया हुनिं झीगु पत्रकारिता भावनात्मक जक जूवन । पत्रकारिताया ख्यलय् मदिक्क न्ह्याःवने फय्केत मदय्क मगाःगु छगू बिधा व्यवसायिकता नं खः ।
 
उकिं, नेवाः भाषं पिदनीगु पत्रपत्रिकां थःपिनिगु, म्हसीका ब्वय्गु, तजिलजिया प्रचारप्रसार याय्गु, भाषा लिपिया संरक्षण व बिकासय् योगदान बीगु, नेवाःतय्गु गतिविधिया बुखँ दय्काः सुचं प्रवाह याय्गु नापनापं व्यवसायिक पत्रकारिता नं याय् हे माः । भाषा म्वाःसा जाति म्वाइ धाःथें पत्रकारितायात लजगाः दय्के फुसा हे जक झीसं याय्गु पत्रकारिता नं मदिक्क न्ह्याइ ।
 
लहना वाःपौ थःपिंसं कयागु आज्जुइ थ्यंकेत गुलित ताःलात धैगु स्वयां वैगु दिनय् आज्जुइ थ्यंकेत अवश्य ताःलाइ धैगु मनंतुना च्वना । सम्पादकनिसें सकलसिगु पलाः थुकथं हे मदिक्क न्ह्याना वनेमा अले प्यसः ल्याः मखु, छुं मखुसां प्यद्वःल्याः थ्यनेमा धकाः नं भिंतुने ! 
 
गन संघर्ष अन उपलब्धि धइगु मूलमन्त्र लुमंकाः लहना न्ह्याय्फय्मा